Zyra e CARE Deutschland e.V. në Kosovë ka shpallur një thirrje të hapur për aplikime, në kuadër të projektit “Horizontet e Gjelbra – Nismat e tranzicionit të gjelbër të udhëhequra nga të rinjtë dhe komuniteti në Kosovën Perëndimore”. Thirrja synon të mbështesë financiarisht organizatat e shoqërisë civile (OSHC) vendore që zhvillojnë nisma ekonomike klimatike në shkallë të vogël, shkruan Katror.info.
Thirrja është hapur më 30 korrik 2025, ndërsa afati i fundit për aplikim është më 21 gusht 2025.
Projekti, i bashkëfinancuar nga Bashkimi Evropian, ka filluar më 1 janar 2025 dhe do të zgjasë 28 muaj. Ai zbatohet nga CARE në partneritet me dy organizata lokale – EC Ma Ndryshe nga Prizreni dhe Syri i Vizionit nga Peja – duke përfshirë komunat e Gjakovës, Mitrovicës (Veri dhe Jug), Pejës dhe Prizrenit.
Mundesh me e lexu edhe…
Qëllimet e projektit
- Synimi kryesor i “Horizonteve të Gjelbra” është forcimi i rolit të të rinjve dhe shoqërisë civile në zhvillimin lokal, demokracinë pjesëmarrëse dhe mbrojtjen e mjedisit. Projekti vendos theks të veçantë te:
- angazhimi i të rinjve (14–25 vjeç) dhe grave në nisma mjedisore,
- ekonominë qarkore dhe tranzicionin e gjelbër,
- rritjen e kapaciteteve të OSHC-ve për të zbatuar projekte inovative dhe të qëndrueshme,
- inkurajimin e bashkëpunimit me institucionet dhe politikëbërësit lokalë për prioritizimin e tranzicionit të gjelbër në nivel komunal.
CARE thekson se përmes kësaj thirrjeje, do të krijohen mundësi për organizatat lokale që të zhvillojnë projekte konkrete, duke forcuar aftësitë e gjelbra dhe sipërmarrësinë e qëndrueshme, si dhe duke nxitur aktivizmin dhe pjesëmarrjen e të rinjve në proceset vendimmarrëse./Katror.info
