Prishtina do të shndërrohet në qendër të skenës artistike më 20 dhe 21 qershor 2025, kur kantata skenike e famshme Carmina Burana nga kompozitori gjerman Carl Orff do të inskenohet për herë të parë në Kosovë, shkruan Katror.info.
Ky produksion i nivelit të lartë pritet të sjellë një spektakël të pashembullt muzikor dhe vizual në Pallatin e Rinisë dhe të Sportit, me pjesëmarrjen e mbi 300 artistëve.
Projekti realizohet nga Filharmonia e Kosovës dhe Baleti Kombëtar i Kosovës, në bashkëpunim me Operën e Kosovës, duke bashkuar kapacitete të mëdha artistike e institucionale për një shfaqje unike në vend. Kantata do të vihet në skenë nën dirigjimin e maestros japonez Toshio Yanagisawa dhe koreografinë e koreografit të njohur Toni Candeloro.
Mundesh me e lexu edhe…
Carmina Burana, e njohur për fuqinë dramatike, ritmet e fuqishme dhe emocionet e thella që përcjell, do të përfshijë solistë vokalë, trupën e baletit, korin dhe orkestrën, të cilët do të interpretojnë këtë vepër monumentale për herë të parë para publikut kosovar. Elementët vizualë dhe koreografikë do të pasurojnë përjetimin artistik, duke e bërë këtë një ngjarje të paharrueshme për adhuruesit e muzikës klasike dhe artit skenik.
Përgatitjet për këtë produksion tashmë kanë nisur, me qëllim të sjelljes së një performance dinjitoze që i përgjigjet standardeve ndërkombëtare. Ky është një moment i rëndësishëm për skenën kulturore të Kosovës, që synon të ofrojë përvoja të reja artistike dhe të forcojë pozitën e saj në hartën e ngjarjeve të mëdha kulturore në rajon./Katror.info
