Kombëtarja e Shqipërisë ka kompletuar përgatitjet për ndeshjen e parë në Euro 2024.
Të shtunën prej orës 21:00 në stadiumin e Dortmundit, Shqipëria luan ndaj Italisë, kampiones në fuqi të Evropës. Shorti nuk ka favorizuar kuqezinjtë, pasi janë në grup me tri prej përfaqësueseve më të mëdha evropiane, Italinë, Spanjën e Kroacinë. Por atmosfera në Kombëtare është shumë e mirë, të gjithë lojtarët janë gati dhe përkrahja do të jetë e jashtëzakonshme. Rreth 50 mijë tifozë shqiptarë priten në stadium për ndeshjen ndaj Italisë. Mijëra shqiptarë edhe të premten kanë festuar në rrugët e sheshet e Dortmundit. Edhe më e zjarrtë atmosfera pritet të jetë të shtunën.
Italianët kanë vlerësuar Kombëtaren e Shqipërisë, por edhe në kampin kuqezi kanë konsideratë për Italinë, kampionen në fuqi. Ndonëse nuk duket në momentin më të mirë, Italia gjithnjë është pretendente për lavdi evropiane.
Mundesh me e lexu edhe…
“Është nder të jem me Shqipërinë në Euro 2024. Ne jemi në një grup shumë të vështirë, është një kompeticion i madh”, ka thënë selektori i Shqipërisë, Sylvinho, të premten pasdite në konferencë për shtyp.
Sipas Sylvinhos, Shqipëria do të dal në fushë për të garuar dhe për të luftuar për çdo pikë e për të pasur një kampionat të shkëlqyer. Ai ka pranuar se ndaj Italisë do të jetë shumë vështirë.
“Kemi shumë shqiptarë nëpër botë, në Gjermani, Itali, Zvicër. Për ne është përgjegjësi e madhe që t’i përfaqësojmë. Stadiumi në masën më të madhe do të jetë kuqezi dhe kjo është përgjegjësi e madhe për ne. Ka shumë diferenca mes Italisë së kaluar dhe asaj të tanishme. Por Italia është një skuadër e nivelit më të lartë, ka lojtarë të shpejtë dhe një trajner të mrekullueshëm. Ka përvojë, është top skuadër. Futet në fushë për ta fituar kompeticionin. Por edhe ne do të futemi për pikë”, ka theksuar Sylvinho.
Tekniku brazilian ka konfirmuar se ekipi kombëtar është i motivuar dhe se djemtë janë të gatshëm.
“Do të jetë ditë e mrekullueshme për ta përfaqësuar vendin tonë. Është ditë me shumë emocione dhe do të bëjmë më të mirën e mundshme”, ka thënë Sylvinho.
Se Shqipëria është gati e ka thënë kapiteni Berat Gjimshiti. Ai ishte lënë jashtë Euro 2016, ku debutoi Shqipëria, dhe kjo ishte vlerësuar padrejtësi e madhe. Por Gjimshiti vazhdoi të luajë për Shqipërinë me përulësi, duke u bërë gradualisht lojtari kryesor. Tani është kapiten. Ka shumë vjet që Gjimshiti luan me sukses të plotë në Itali, tek Atalanta.
“Të tri ndeshjet janë të rëndësishme, por nëse nisim me këmbë të mbarë mund të kemi ndihmën dhe motivin për të ecur përpara. Një rezultat pozitiv ndaj Italisë mund të jetë shtysë e madhe për ndeshjet tjera”, ka thënë Gjimshiti.
Në debutim, në Euro 2016, Shqipëria shënoi një fitore. Tani me shumë gjasë i duhen më shumë për të avancuar. Grupin e ka shumë të fortë, më të fortin në Euro 2024. Edhe Kombëtarja shqiptare vlerësohet dukshëm më e fortë se atëherë. /Katror.info
Përgatiti:
