Bernard Challandes, trajneri i njohur zviceran që në të kaluarën ka drejtuar si Kombëtaren e Kosovës ashtu edhe atë të Armenisë, do të jetë i pranishëm në stadiumin “Fadil Vokrri” në Prishtinë, për ta ndjekur nga afër ndeshjen miqësore mes dy kombëtareve.
Takimi mes Kosovës dhe Armenisë do të zhvillohet të premten, dhe prania e Challandes e shton vlerën emocionale të kësaj përballjeje. Lajmi është konfirmuar nga kryetari i Federatës së Futbollit të Kosovës, Agim Ademi, i cili ka bërë të ditur se Challandes është rikthyer në Kosovë me ftesën e tij personale.
“Me ftesën time, në Kosovë është rikthyer miku ynë i veçantë, Bernard Challandes. Ish-trajneri i Kosovës dhe më herët edhe i Armenisë do të jetë i pranishëm në ndeshjen miqësore mes dy kombëtareve që ai dikur i ka drejtuar me pasion dhe përkushtim. Kjo sfidë është më shumë sesa një ndeshje futbolli për të, është një rikthim emocional, një përballje me kujtimet dhe emocionet që e kanë shoqëruar në dy kapituj të rëndësishëm të karrierës së tij si trajner”, ka shkruar Ademi në Facebook.
Mundesh me e lexu edhe…
Ai shtoi se Challandes ka pasur mundësinë të takohet me përzgjedhësin aktual të Kosovës, Franco Foda, si dhe me disa nga futbollistët e përfaqësueses, me të cilët ruan lidhje miqësore dhe respekt të ndërsjellë./Katror.info
