Linja ajrore gjermane Lufthansa është shpallur për të dytin vit radhazi “Linja Ajrore Më e Mirë në Evropë” në ceremoninë e World Travel Awards 2025 – të njohura gjerësisht si “Oscars e turizmit” – e mbajtur javën e kaluar në Sardenjë, Itali.
Ajo mposhti linja të tjera të njohura evropiane si KLM Royal Dutch dhe British Airways për titullin e “Linjës Ajrore Kryesuese të Evropës”. Lufthansa e ka fituar këtë çmim 13 herë që nga fillimi i ndarjes së çmimeve në vitin 1993, duke mbajtur një seri të pandërprerë fitoreje nga viti 2011 deri në 2016.
Këtë vit, Lufthansa mori gjithashtu çmimet për klasën ekonomike më të mirë dhe markën më të mirë të linjës ajrore në Evropë.
Mundesh me e lexu edhe…
Kompania fluturon drejt më shumë se 200 destinacioneve në mbarë botën dhe është linja e dytë më e madhe evropiane për nga numri i pasagjerëve, pas Ryanair-it.
Një tjetër kompani që bën pjesë në grupin Lufthansa, Swiss International Air Lines, fitoi çmimet për Klasën e Parë më të Mirë në Evropë dhe Klasën e Biznesit më të Mirë në Evropë. Grupi Lufthansa përfshin gjithashtu Brussels Airlines, Discover Airlines, Eurowings, Edelweiss Air, Air Dolomiti dhe Austrian Airlines.
World Travel Awards njohin më të mirët në industrinë globale të udhëtimeve dhe turizmit – përfshirë operatorët turistikë, hotelet, destinacionet dhe linjat e lundrimit duke vlerësuar faktorë si përpikëria, cilësia dhe konsistenca e shërbimit.
Fituesit përzgjidhen përmes një sistemi votimi të dyfishtë, që përfshin vota nga profesionistë të industrisë dhe konsumatorë të kualifikuar, me peshë më të madhe për votat e ekspertëve të udhëtimeve.
Përveç Lufthansës, në listën e 10 linjave ajrore më të mira të Evropës këtë vit u përfshinë: British Airways, KLM Royal Dutch, Air France, Icelandair, Iberia, Swiss International Air Lines, Turkish Airlines, TAP Air Portugal dhe SAS Scandinavian Airlines. /AP/Katror.info
