Nivelet e ndotjes së ujit në lumin Senë të Parisit janë përmirësuar, treguan të dhënat të enjten, tre javë përpara Lojërave Olimpike, në të cilat rruga kryesore ujore e kryeqytetit francez është menduar të jetë një nga vendet e garave të notit.
Të dhënat e publikuara nga autoritetet e qytetit dhe ato rajonale treguan se përqendrimet e enterokokëve dhe baktereve E.coli ishin nën kufijtë ligjorë gjashtë nga nëntë ditë nga 24 qershori deri më 2 korrik.
“Me gjithë një normë ende të lartë të rrjedhës, cilësia e ujit të Senës u përmirësua gjatë periudhës në shqyrtim, me cilësinë e ujit në përputhje me pragjet e përcaktuara nga direktiva evropiane për gjashtë ditë,” tha Bashkia e Parisit në një deklaratë së bashku me rezultatet.
Mundesh me e lexu edhe…
Nivelet e ndotjes ishin përmirësuar mjaftueshëm për t’u larë javën e kaluar, thanë autoritetet.
Nivelet varen nga reshjet dhe temperatura e ujit midis faktorëve të tjerë. Me mot të mirë këtë javë në Paris, cilësia e ujit pritet të mbetet e mirë.
Kryeqyteti francez ka punuar për pastrimin e Senës në mënyrë që njerëzit të mund të notojnë përsëri në të, siç ishte rasti gjatë Lojërave Olimpike të Parisit të vitit 1900. Por një problem me kanalizimet verën e kaluar çoi në anulimin e një gare noti paraolimpike.
Garat e notit në triatlon dhe maratonë të Olimpiadës, të cilat zhvillohen nga 26 korriku deri më 11 gusht, janë planifikuar të mbahen në Senë.
Kryetarja e bashkisë së Parisit, Anne Hidalgo, e cila përkrahu një fushatë për të pastruar lumin dikur të ndotur në kohë për Olimpiadën, muajin e kaluar shtyu zhytjen e saj të planifikuar në lumë. Ajo tha se ka të ngjarë të ndodhë pas zgjedhjeve të parakohshme franceze, raundi i dytë i të cilave do të zhvillohet të dielën, dhe pas festimeve vjetore të 14 korrikut të Ditës së Bastilës./Katror.info
Përgatiti:
