Manchester City – Liverpool do të jetë kryendeshja e xhiros së 11-të në Premier Leaguen angleze. Por edhe e gjithë futbollit evropian.
Ndeshja City – Liverpool do të luhet të dielën nga ora 17:30 në “Etihad”.
City dhe Liverpooli janë ekipe që vitet e fundit kanë luftuar për titull të kampionit. Aktualisht janë në ndjekje të liderit të kampionatit anglez, Arsenalit.
Mundesh me e lexu edhe…
Arsenali udhëheqë në tabelë me 25 pikë. Manchester City ka 19 pikë në vendin e dytë, kurse Liverpooli ka një pikë më pak në pozitën e tretë.
Të dyja skuadrat janë në moment të mirë.
“Të kuqtë” ishin në krizë të rezultateve, por tashmë kanë regjistruar dy fitore radhazi.
Të martën në kuadër të xhiros së katërt të “Championsit”, Liverpooli e mposhti Real Madridin me rezultatin 1:0.
Ndërkohë, City të mërkurën fitoi thellë, 4:1, ndaj Borussia Dortmundit.
City nuk është mposhtur në “Etihad” nga Liverpooli në shtatë ndeshjet e fundit, duke regjistruar katër fitore dhe tri barazime.
Ndërkohë Liverpooli ka pësuar humbje në shtatë nga nëntë ndeshjet e fundit në udhëtim.
Manchester City ka fituar pesë nga gjashtë ndeshjet e fundit në të gjitha garat. Skuadra e Pep Guardiolas konsiderohet favorite ndaj kampionit në fuqi të Anglisë, Liverpoolit.
Mateo Kovaçiq do të mungojë te City, kurse Liverpoolit do t’i kthehet sulmuesi suedez, Alexander Isak. Trajnerit të Liverpoolit, Arne Slot, do të mungojnë sërish portieri Alisson Becker dhe mbrojtësi i krahut, Jeremie Frimpong.
Aktualisht te City është duke shkëlqyer sulmuesi norvegjez, Erling Haaland, i cili ka shënuar 18 gola në 14 paraqitje në të gjitha garat që nga përfundimi i Kupës së Botës për klube.
Për spanjollin Guardiola ndeshja ndaj Liverpoolit do të jetë e veçantë.
Për 54-vjeçarin do të jetë ndeshja e 1000-të si trajner.
Në total mes Cityt dhe Liverpoolit janë zhvilluar 194 ndeshje. Liverpooli ka 92 fitore. 52 fitore i ka Manchester City, kurse 50 ndeshje nuk kanë dhënë fitues.
Të shtunën do të jetë një ndeshje e veçantë për Granit Xhakën, që luan kundër ish-skuadrës së tij Arsenalit, tani si kapiten i Sunderlandit.
Sunderlandi nga ora 18:30 e pret Arsenalin. Sunderlandi ka 18 pikë dhe e zë vendin e katërt.
Xhaka për “topçinjtë” luajti nga viti 2016 deri në vitin 2023. /KOHA/Katror.info
