Për adhuruesit e hiking, një lajm i mirë vjen nga Pishat e Sllatinës, park ky vetëm 12 kilometra larg Prishtinës. Nëse çdo gjë shkon sipas planit, atëherë vitin e ardhshëm mund të kenë një shteg prej 21 kilometrash ecjesh, ndryshe nga 4.8 sa është aktualisht.
Nënkryetari i komunës së Fushë Kosovës, Besnik Osmani, në një intervistë për Katror Media, tregon detajet e planit.
“Ne po e krijojmë një koncept të ecjes dhe të shfrytëzimit të hapësirave tona. Nga Bardhi i madh do të mund të kalohet nëpër Pisha të Sllatinës, nëpër pjesën e Malit të Çiçavicës dhe do të lidhet me pjesën e Harilaçit dhe me pjesën e Kalasë. Për momentin kemi 4.8 kilometra stazë të përpunuar që mund të përdoret pa llogaritur shtigjet natyrore. Kemi fazën e dytë që ju fola që ne po e zbatojmë që është përafërsisht 4.3 km dhe pastaj e kemi fazën e tretë që e lidh me Harilaçin. Kështu që do të bëhet përgjithësisht diku 21 kilometra stazë ecjeje e mrekullueshme e natyrës.”
Mundesh me e lexu edhe…
Përveç pishave të mrekullueshme, ky park është habitat edhe i ketrave, breshkave dhe kafshëve tjera, sikurse edhe shpezëve të mahnitshëm. Komuna e Fushë Kosovës po përpiqet që të rrisë edhe më tepër kapacitetin e shfrytëzimit nga vizitorët.
“Parku te Pishat është një vend i mrekullueshëm dhe ne si komunë po mundohemi që të bëjmë investime çdo vit, në mënyrë që ta rrisim kapacitetin e shfrytëzimit, sepse edhe numri i vizitorëve është më i madh. Tash është një problem administrativ, praktik, se përmes pishave kalon një rrugë që i lidh pronat e banorëve të Sllatinës dhe fshatrave tjera dhe ne nuk jemi në pozicion që ta mbyllim në mënyrë që të mos i lejojmë veturat andej.”
Pamjet mahnitëse nga ky park, shpesh prishen nga hedhja e mbeturinave vend e pa vend. Zgjidhja përvec rritjes së vetëdijes së qytetarëve, po provohet të gjindet edhe nga komuna.
“1:04 Çështja e dytë është se ne kemi nevojë për themelimin e një ndërmarrjeje publike që do të merrte menaxhimin dhe mirëmbajtjen e parkut, ka nevojë që të marrë përsipër edhe pjesët tjera të qytetit dhe fshatrat. Por, investimet nuk po ndalen. Për momentin te Parku i Sllatinës që lidh me Bardhin e Madh, Grabocin, Pomozotinin, që lidh një shteg të këmbësorëve dhe një shteg për biçikleta. Unë e kam vizituar javën e kaluar dhe është pjesa intensive e punimeve. Presim për pak muaj ta lirojmë.”
Për ata që ende nuk kanë vizituar, Parkun e Pishave mund ta shohin edhe në faqen zyrtare në Facebook, që menaxhohet nga vendasit dhe që bëjnë një punë fantastike në promovimin dhe thirrjen për kujdesin te parkut të mrekullueshëm jo larg kryeqytetit./Katror.info
Përgatiti:
