Në organizim nga OJQ “Dua” – tri ditë plot art e kulturë në Hanin e Elezit. Lexoni gjithçka që ndodhi në edicionin e parë të festivalit plot magji – CrossRoads Festival.
Me moton “Kufiri nuk është ndarje, por pikëtakim”, për herë të parë, në qytetin e bukur të Hanit të Elezit ndodhi diçka e jashtëzakonshme.
Drejtori i përgjithshëm i festivalit, Armend Ballazhi, shpjegoi impaktin që festivali ka pasur këtë vit tek komuniteti dhe ngjarjet kulturore që lanë gjurmë.
Mundesh me e lexu edhe…
Ai bashkë me producenten ekzekutive Zana Duraku e bënë të mundur që qyteti i Hanit të Elezit të bëhej për herë të parë qendër e artit vizual, inovacionit, kulturës dhe performancave të kohshme artistike.
Të gjithë u mblodhën në oborrin e Shtëpisë së Kulturës – artistë nga Kosova, Shqipëria dhe Evropa – për të vazhduar me aktivitete të shumta. Dita filloi me tri workshope njëkohësisht.
Regjisorja Meli Qena mori grupin e saj nga më të vegjlit e pranishëm për të vazhduar me punëtorinë “Duart flasin”.
Brianda Carreras me workshopin për adoleshentë “Unë, këtu, tani” dhe Fatbardh Kabashi me workshopin mbi identitetin, vendin dhe ndjenjën e përkatësisë.
E mbrëmja e ditës së parë në memorialin Bllaca ‘99 u mbyll me shumë emocion, ku artistët nga Barcelona hapën zyrtarisht festivalin CrossRoads në gjuhën shqipe.
Më pas, me një atmosferë tejet të veçantë, u shfaq Kori “Siparantum”, të cilët po korrin suksese në gjithë botën.
Në prapavijë – instalacioni “Dritë” nga Florian Çanga, i cili kishte përdorur imazhe nga pikturat e Jakup Ferrit dhe i kishte vendosur në vagonët e trenit, duke dhënë emocione pa fund.
E krejt në fund, këngëtari Shpend Hysaj, përveç performancës, tregoi edhe përjetimet e tij gjatë qëndrimit në Bllacë në kohën e luftës.
Pas një nisjeje të suksesshme dhe energjike në ditën e parë, Festivali Ndërkombëtar Kulturor “CrossRoads Festival” në Han të Elezit po vazhdon të sjellë emocione të reja dhe përvoja të pasura kulturore.
Mëngjesin e hershëm të ditës së dytë, pjesëmarrësit u mblodhën për ecje në natyrë në zemër të Hanit të Elezit.
Të shoqëruar nga guidat Bedri Bushi dhe Agron Qajani, ata shijuan edhe punëtorinë e quajtur “Green Path Workshop” në Pishat e fshatit Goranc, duke përjetuar një lidhje me ambientin.
Ndërkohë që një pjesë e pjesëmarrësve po shijonin ecjen, në qytet po zhvilloheshin punëtori të tjera kreative me fëmijë dhe të rinj.
Dyshja spanjolle “The Eccentrics” nga trupa e teatrit rrugor “Insolits”, solli një përvojë krejtësisht të re përmes lojës dhe humorit.
Në mbrëmje, vëmendja u zhvendos në hapësirën e objektit “SharrCem”, me Galerinë e hapur “EX 99” që shndërroi ambientin e jashtëm në një hapësirë ekspozuese unike.
Njëherësh, instalacioni i dritës “Tingujt e Horizontit” krijoi ndërthurje mes industrisë së vjetër dhe artit bashkëkohor, duke reflektuar mbi lidhjen mes së kaluarës dhe së tashmes.
Florian Çanga dhe pianisti Alzan Gashi sollën performancën “I Pari Ishte Tingulli”, me një qasje eksperimentale ndaj zërit dhe hapësirës.
Nata u përmbyll nën muzikën e Edona Reshitaj në skenën tek Qendra e Kulturës – që ishte pikërisht ajo çka i nevojitej të pranishmëve pas një dite dinamike.
Ndërkaq, dita e tretë filloi më ndryshe.
Në Qendrën e Kulturës u organizua tryeza shkencore “Udhëkryq i Kujtesës”, ku tema kryesore ishte pasuria kulturore e sportive, trashëgimia e Hanit të Elezit, siguria dhe vlerat kombëtare.
Ky diskutim zë një rol të veçantë për organizatorët, si një element thelbësor i programit të festivalit.
Regjisorja dhe aktorja e njohur Meli Qena, pas tri ditësh angazhim me fëmijët, solli shfaqjen “Duart flasin” në sallën e teatrit tek Qendra e Kulturës “Imri Curri”.
Nata e fundit e festivalit u hap me mbrëmjen poetike të autores Ilire Zajmi, e pasuruar me instalacionet e dritës nga Florian Çanga në ambientet e Qendrës së Kulturës.
Një workshop tjetër i veçantë ndodhi në ditën e tretë – “Të gjithë jemi të njëjtë” – ku pjesëmarrës ishin fëmijët me nevoja të veçanta, nën udhëheqjen e profesorit Akif Shkreta.
Në këtë hapësirë, energjia e mirë vazhdoi me shfaqjen muzikore të Nezafete Shalës dhe “Melodisë së Vjetër”, që me gjallëri e emocion shënuan mbylljen e festivalit “CrossRoads” për këtë vit./Katror.info
