Rame Lahaj International Opera Festival (RILOF) ka njoftuar zyrtarisht se biletat për Gala Night “Rame Lahaj & Friends” tashmë janë në shitje, për një mbrëmje që do të mbahet më 2 gusht në sheshin “Skënderbeu” në Prishtinë, shkruan Katror.info
Kjo ngjarje, që konsiderohet kulmi i festivalit, këtë vit merr një rëndësi të veçantë pasi shënon pesëvjetorin e themelimit të festivalit të vetëm operistik ndërkombëtar në Kosovë. Nën qiellin e hapur, publiku do të përjetojë një natë të mbushur me emocione, muzikë klasike të nivelit më të lartë dhe një atmosferë magjike.
“Mbrëmja gala nuk është vetëm një koncert – është një festë e artit, një reflektim mbi një rrugëtim pesëvjeçar të ndërtuar me përkushtim dhe pasion për operën,” thuhet në njoftimin e RILOF.
Mundesh me e lexu edhe…
Ngjarja nis në orën 20:30 dhe pritet të mbledhë artdashës nga mbarë vendi dhe më gjerë. Biletat mund të blihen online në këtë link si dhe në pikat fizike të shitjes të shënuara në hartën përkatëse.
Organizatorët ftojnë publikun të sigurojë biletat sa më herët, pasi kërkesa për këtë natë të veçantë është shumë e lartë./Katror.info
