Episodi i katërt i dokumentarit “4 Çerekët” sjell kujtime dhe momente kyçe nga rruga e basketbollit të Kosovës. Në këtë pjesë, ish-basketbollisti dhe gazetari sportiv Blerim Vuniqi rrëfen se si pasioni për lojën nisi si hobi, u shndërrua në profesion dhe më pas në stil jete.
“Kam nisur kur nuk ka pasur as trepikësh, as semaforë, as kosh me faul. Kam luajtur në ligat e një shteti që sot nuk ekziston dhe në ligat e një shteti që po e themelonim vetë, pa e ditur se kur ajo ëndërr do të bëhej realitet. Kam luajtur në beton, në sallat e sporteve e palestrat e shkollave fillore. Kam transmetuar Ligën e Kosovës nga sallat e ftohta me telefon statik për radio. Kam transmetuar NBA-n dhe Lojërat Olimpike,” – kujton Vuniqi.
Në këtë episod, protagonist është edhe Dardan Berisha, i cili tregon momentin kur vendosi të luajë për Kosovën, duke u larguar nga përfaqësuesja e Polonisë.
Mundesh me e lexu edhe…
“70 vjet pas ndeshjes ndërkombëtare të Prishtinës me Moda Sportin dhe dekada pas ndeshjes së parë të seleksionit të Kosovës me Malin e Zi, Kosova po bëhej gati për ndeshjet e FIBA-së,” thotë Blerim Vuniqi.
“Unë kam qenë në 12-shen e Polonisë dhe ishim në aeroplan kur më afrohet presidenti i federatës së Polonisë, ulet afër meje dhe më tregon se Kosova është pranuar në FIBA. Disi nuk po mundesha ta besoja, aq emocion ishte. Por ata që nga fillimi e kanë ditur lidhjen time me Kosovën. Edhe kur zbritëm nga aeroplani, ajo 12-she vetëm sa ishte e vendosur, dhe unë isha pjesë e saj. Ata e kuptuan dhe nuk më bënë asnjë problem, për çka i falënderoj shumë, edhe vetëm jom largu prej atje edhe kom ardhë këtu,” rrëfen Berisha.
Dokumentari “4 Çerekët”, i autorit dhe producentit Leart Hoxha, me intervista të realizuara nga Blerim Vuniqi, është prodhim i Katror Media dhe mbështetet nga Ministria e Kulturës, Rinisë dhe Sportit.
Episodin e katërt mund ta ndiqni këtu:
