Autori britanik-hungarez David Szalay është shpallur fitues i çmimit prestigjioz “Booker 2025” me romanin e tij, Flesh, duke u bërë shkrimtari i parë me origjinë hungarezo-britanike që merr këtë vlerësim.
Juria e përshkroi romanin si “të jashtëzakonshëm” dhe “thellësisht të veçantë”.
Flesh ndjek jetën e Istvanit, një burrë joshës, enigmatik dhe emocionalisht i shkëputur, nëpër etapa të ndryshme të ekzistencës së tij — nga një kompleks banimi në Hungari, deri në rrethin e ultra të pasurve në Londër.
Mundesh me e lexu edhe...
Kryetari i jurisë, shkrimtari Roddy Doyle, theksoi se veçantia e librit ishte ajo që e dalloi: “Nuk është si asnjë libër tjetër. Është i errët, por të gjithë e lexuam me kënaqësi”.
Në jurinë e këtij viti bënte pjesë edhe aktorja Sarah Jessica Parker.
Romani ka marrë mbështetje edhe nga figura të njohura të kulturës pop, si Dua Lipa dhe Stormzy.
Lipa e përfshiu Flesh muajin e kaluar në klubin e saj të librit, duke e quajtur një “lexim të tensionuar dhe tërheqës”.
Pas marrjes së çmimit, Szalay u shpreh se ishte “i hutuar” nga fitorja: “E kisha bindur veten se nuk do të fitoja, vetëm për ta kaluar mbrëmjen pa stres. Tani më duhet pak kohë të mësohem me këtë lajm, i cili sigurisht është fantastik”.
Flesh ka marrë vlerësime entuziaste nga kritika. The Guardian e cilësoi “një portret të shkëlqyer të një burri” dhe “një eksplorim emocionues të asaj që do të thotë të jesh gjallë”, ndërsa Sunday Times vlerësoi mjeshtërinë e autorit për të treguar tre faza të njeriut modern përmes një personazhi të vetëm./AP/Katror.info
