Një delegacion gjashtëanëtarësh i Kongresit të Autoriteteve Lokale dhe Rajonale të Këshillit të Evropës, i udhëhequr nga Dominique Leveque, do të zhvillojë një mision vëzhgues nga data 9 deri më 13 tetor 2025 për të monitoruar zgjedhjet lokale që do të mbahen më 12 tetor në Kosovë, raporton Katror.info.
Gjatë kësaj vizite, delegacioni do të takohet me përfaqësues të Zyrës së Bashkimit Evropian në Kosovë, përfaqësues të komunitetit ndërkombëtar dhe trupit diplomatik, anëtarë të Komisionit Qendror të Zgjedhjeve (KQZ), si dhe me Drejtorin Ekzekutiv të Asociacionit të Komunave të Kosovës dhe Kryetarin e Komunës së Prishtinës.
Delegacioni do të zhvillojë gjithashtu diskutime në formë paneli me përfaqësues të mediave dhe organizatave joqeveritare, si dhe do të marrë pjesë në sesione informuese me kandidatë dhe përfaqësues të partive politike.
Mundesh me e lexu edhe…
Në ditën e zgjedhjeve, katër ekipe të Kongresit do të shpërndahen në mënyrë të rastësishme nëpër Kosovë për të vëzhguar procesin zgjedhor në vendvotime.
Një komunikatë për shtyp me gjetjet preliminare do të publikohet të hënën, më 13 tetor, në orën 12:00, në faqen zyrtare të Kongresit.
Përbërja e delegacionit të Kongresit:
- Dominique LEVEQUE, Francë (L, SOC/G/PD), Udhëheqës i delegacionit
- Marcin GOLASZEWSKI, Poloni (L, EPP/CCE)
- Belinda GOTTARDI, Itali (L, SOC/G/PD)
- Truls GIHLEMOEN, Norvegji (R, ECR)
- Urs JANETT, Zvicër (R, ILDG)
- Günes PEHLIVAN, Turqi (R, SOC/G/PD) /Katror.info
