Më ngrohtë, më lirë, më shumë komoditet. Kështu mund ta presin dimrin 100 familjet e ndërtesave sociale në Skënderaj.
“Ende pa ardhë dimri, e kemi hetu që ka qenë më nxehtë. Herë-herë që u kanë do ditë më ftohtë, e kemi hetu që ma nxehtë. Edhe verën po është ma fllad, brenda na e kanë vendos klimën,” thotë Bajram Shatri, një nga 100 kryefamiljarët e tri ndërtesat e banesave sociale, në të cilën të martën u përuruan punimet për efiçiencë të energjisë.
Ky investim prej 700,000 eurosh është bërë në kuadër të Pakos së Mbështetjes për Energji të financuar nga Bashkimi Evropian, të zbatuar nga Fondi i Kosovës për Efiçiencë të Energjisë (FKEE). Investimi përfshiu izolim, dritare dhe dyer të reja, sisteme për ngrohje dhe ventilim, ndriçim dhe rinovim të zonave të përbashkëta. Ky investim shihet si hap drejt tranzicionit të gjelbër, duke zvogëluar në masë tepër të madhe shpenzimin e energjisë elektrike.
Mundesh me e lexu edhe...
“Jam jashtëzakonisht krenar, jo vetëm për këtë projekt, por edhe për të gjitha veprimet që ishin paraparë në kuadër të pakos së mbështetjes për energji. Ishte një sfidë e madhe, që nga fillimi, sepse Bashkimi Evropian vendosi në fund të vitit 2023, në fakt në fillim të vitit 2023, të ofrojë 75 milionë euro për Kosovën për të përballuar krizën energjetike. Pra, në thelb bashkëpunuam me qeverinë, sigurisht, dhe me Fondin për Efiçiencë të Energjisë, për të identifikuar veprimet specifike dhe më pas për t’i zbatuar ato. Kështu që ishte një sfidë mjaft e madhe, por jam absolutisht krenar për rezultatin deri më tani. Dua të them, shumë familje, shumë familje të cenueshme u ndihmuan, si në këto raste kur u ofruam atyre banesa me efiçiencë energjetike,” thotë përfaqësuesi i Zyrës së BE-së, Alessandro Bianciardi.
E gjatë ceremonisë së përurimit, ku morën pjesë përfaqësues të Zyrës së BE-së, Qeverisë se Kosovës, komunës e Fondit për Eficiencë te Energjisë, u tha se me investime të tilla përfitimet janë të shumanshme.
“Këto janë investime tejet të rëndësishme, të cilat janë shumë përtej infrastrukturës që po bëhet dhe kursimit të energjisë, që është në këto ndërtesa prej 75-85 për qind më pak do të konsumojnë energji, mirëpo shumë më shumë se kaq, kjo do të thotë kushte më të mira për banorët, më të shëndetshme për ta, për fëmijët, familjet e tyre dhe do të thotë një jetë më e dinjitetshme, por edhe më e sigurt, duke qenë se përveç investimeve që janë bërë këtu në hyrje në dysheme, në izolim të çatisë, të ndërrimit të dritareve dhe dyerve, izolimin e ndërtesës, gjithashtu janë vendosur edhe sistemi i interfonisë që mundëson të ketë siguri më të lartë. Jam shumë e lumtur që pas tri vitesh prej kur kemi filluar ta dizajnojmë këtë pako së bashku, ishte kërkesa e Qeverisë ndaj BE-së, ndaj të cilës Bashkimi Evropian reagoi pozitivisht dhe në mënyrë shumë të shpejtë, jam e lumtur që po i shohim rezultatet e saj,” tha Ministrja në detyrë e Ekonomisë, Artane Rizvanolli.
Përfaqësuesi i BE-së, Biancardi thotë se në fokus të pakos së mbështetjes për energji ishte ndihma për familjet dhe bizneset të përballojnë ndikimin e krizës energjetike.
“Por gjithashtu të përmirësojë përballueshmërinë e energjisë dhe të mbështesë familjet më të ndjeshme. Masat për eficiencë të energjisë janë një mënyrë shumë efektive për të ndihmuar dhe mbrojtur konsumatorët në nevojë,” deklaroi Bianciardi.
Fadil Nura, kryetari i Skënderajt falënderoi partnerët për këtë investim.
“Një bashkëfinancim dhe bashkë-koordinim që po jep inputet e para këtu në Skenderaj ka dy elemente kryesore rasti i këtij projekti: e para do të ndikojë në reduktimin e shpenzimeve të energjisë elektrike, dhe në të njëjtën kohë kemi investuar në një pjesë të komunitetit që ka pasur nevojë. Jam jashtëzakonisht i kënaqur që jemi komuna e parë që po implementon dhe finalizon një projekt kaq të rëndësishëm,” u shpreh Nura.
Driton Hetemi nga Fondi për Efiçiencë të Energjisë pret që projekti të zgjerohet.
Pritjet tona janë që ky projekt me vazhdu më tutje dhe me u multpliku sa më shumë në gjithë sektorin me ndihmën e partnerëve tanë,” u shpreh ai.
Si u arrit që me këtë investim, këto ndërtesa të kenë kursim energjie prej 85 për qind?
“Duke pasur parasysh se nuk kanë pasur asnjë pikë termoizolim, dritare jashtëzakonisht të dobëta, i kanë mbyll me bulona dritaret, ka pasë rrjedhje enorme të temperaturave, duke e krahasuar me kualitetin që tash është instaluar në banesat e tyre, është arritur ai kursim,” thotë Kreshnik Muhaxheri, menaxher në Fondin për Efiçiencë të Energjisë.
Renovimi i ndërtesave të tilla është pjesë e një programi më të gjerë në nivel vendi, ku janë të përfshira 28 ndërtesa sociale në një vlerë totale prej 6 milionë euro. Këto investime po realizohen me përkrahje financiare të BE-së në masë 90 përqind dhe bashkëfinancim të komunave prej 10 përqind.
BE-ja thotë se mbetet e përkushtuar ndaj mbështetjes për dekarbonizimin dhe tranzicionin energjetik të Kosovës./Katror.info
Përgatiti:
