Ministria e Ekonomisë ka bërë të ditur se, sipas njoftimit të pranuar nga Bashkimi Evropian, procedurat për disbursimin e fondeve për subvencionimin e pajisjeve efiçiente pritet të përmbyllen deri në muajin korrik 2025. Pas këtij hapi, Ministria do të nisë ekzekutimin e pagesave për qytetarët përfitues, shkruan Katror.info.
“Kjo pako është dizajnuar për të mbështetur drejtpërdrejt qytetarët, përfshirë familjet me të ardhura të ulëta dhe kategori të tjera të cenueshme, përmes subvencionimit të pajisjeve me efiçiencë të lartë të energjisë dhe sistemeve të energjisë së ripërtëritshme në sektorin e amvisërisë”, thuhet në komunikatën e Ministrisë.
Deri më tani janë përzgjedhur 11,188 përfitues me një vlerë të përgjithshme prej 4,987,061 euro, të cilët kanë përmbushur të gjitha kriteret dhe janë njoftuar përmes komisioneve përkatëse. Gjithashtu, mbeten edhe 1,459 përfitues nga radhët e qytetarëve dhe 10 biznese që pritet të marrin fondet e tyre deri në fund të korrikut.
Mundesh me e lexu edhe…
Ministria ka theksuar se ka përmbyllur me kohë të gjitha procedurat administrative dhe teknike, në përputhje me vendimin e Qeverisë së Kosovës, ndërsa raporti përfundimtar i zbatimit është dorëzuar në Zyrën e BE-së në Kosovë më 28 shkurt 2025.
“Ministria e Ekonomisë shpreh keqardhje për vonesën e disbursimit të mjeteve tek një pjesë e përfituesve si rezultat i kësaj situate”, përfundon komunikata./Katror.info
