Më 5 mars, në Davis Center for Russian and Eurasian Studies në Universitetin e Harvardit do të mbahet një diskutim mbi perspektivat gjeopolitike dhe gjeoekonomike të Ballkanit Perëndimor, shkruan Katror.info.
“Një diskutim i veçantë në panelin ‘Ballkani Perëndimor në një Peizazh Global të Trazuar: Perspektiva Gjeopolitike dhe Gjeoekonomike’ do të mbahet në Davis Center for Russian and Eurasian Studies në Universitetin e Harvardit më 5 mars, nga ora 18:00 deri në 20:00”, thuhet në komunikatën për shtyp të Davis Center Russian and Eurasian Studies.
“Ky diskutim i rëndësishëm do të analizojë dinamikat e ndryshueshme gjeopolitike dhe gjeoekonomike të Ballkanit Perëndimor, duke shqyrtuar ndarjet kombëtare, aleancat në ndryshim dhe sfidat e rajonit përballë pasigurive globale. Panelistët do të diskutojnë lidhjet e Ballkanit Perëndimor me fuqitë perëndimore, luftën hibride të Rusisë dhe ndikimin e investimeve ruse dhe kineze në skenën politike dhe ekonomike të rajonit. Diskutimi do të theksojë gjithashtu varësitë ekonomike, trendet tregtare dhe investimet, duke nënvizuar nevojën për qëndrueshmëri dhe bashkëpunim rajonal”, thuhet tutje në njoftim.
Mundesh me e lexu edhe…
Ngjarja organizohet nga Dr. Pëllumb Çollaku dhe mbështetet nga Davis Center for Russian and Eurasian Studies. Dr. Çollaku është Studiues Vizitor Fulbright në këtë qendër dhe në Departamentin e Ekonomisë në Harvard. Në panel do të marrin pjesë ekspertë nga fusha e politikës dhe ekonomisë, përfshirë Dr. Albana Shehaj, Dr. Albulenë Kastrati, Dr. Flora Ferati-Sachsenmaier dhe vetë Dr. Çollaku. Diskutimi pritet të sjellë analiza të thelluara mbi rolin e Ballkanit Perëndimor në skenën globale dhe pasojat e zhvillimeve të fundit për të ardhmen e rajonit.
Panelistët do të shqyrtojnë varësitë ekonomike të vendeve të Ballkanit Perëndimor, duke u fokusuar në trendet tregtare dhe investimet strategjike që ndikojnë në stabilitetin ekonomik.
Vegëza e ngjarjes: https://daviscenter.fas.harvard.edu/events/western-balkans-turbulent-global-landscape-geopolitical-and-geoeconomic-perspectives
/Katror.info
Përgatiti:
