Princi i Uellsit, William, ka deklaruar se do të sjellë ndryshime në monarki kur të bëhet mbret, në një intervistë që burime nga pallati e cilësojnë si më të hapurën që ai ka dhënë ndonjëherë.
Në një bisedë me aktorin Eugene Levy, për emisionin e Apple TV+ The Reluctant Traveller, Princi William foli hapur për të ardhmen dhe rolin e tij si mbret.
“Është e sigurt të them se ndryshimi është në agjendën time. Një ndryshim për të mirë, që më pëlqen. Nuk i frikësohem asaj – përkundrazi, më emocionon ideja se mund të sjell disa ndryshime. Jo tepër radikale, por ndryshime që mendoj se duhen bërë,” tha ai, shkruan BBC, transmeton Katror.info.
Mundesh me e lexu edhe…
Tradita, por edhe pyetje për të ardhmen
Gjatë turit në kështjellën e Windsor-it, Princi William theksoi rëndësinë e traditës, por shtoi se është i gatshëm të pyesë nëse disa zakone ende kanë vlerë sot.
“Ka raste kur sheh traditat dhe pyet: a janë ende të përshtatshme? A po japim ndikimin më të madh që mundemi? Më pëlqen të vë gjithçka në pikëpyetje,” tha ai.
Princi shtoi se historia mund të bëhet një peshë e rëndë nëse nuk përballohet siç duhet:
“Nëse nuk je i kujdesshëm, historia mund të të shtypë dhe të të kufizojë shumë. Unë mendoj se është e rëndësishme të jetosh për këtu dhe tani.”
Familja dhe sfidat personale
Gjatë shëtitjes me aktorin dhe qenin e familjes, Orla, Princi William foli për familjen, fëmijët dhe vështirësitë e përballimit të sëmundjeve të bashkëshortes dhe të atit, të cilët janë duke u trajtuar për kancer.
“Gjërat që lidhen me familjen më mbingarkojnë më shumë se çdo gjë tjetër. Stresi dhe shqetësimi për familjen më prekin shumë,” u shpreh ai.
Në një pub pranë kështjellës, Princi tregoi edhe mënyrën se si i ka mbështetur fëmijët gjatë kohës kur nëna e tyre ishte e sëmurë.
“Përpiqemi t’u japim siguri dhe mbrojtje. Jemi një familje e hapur dhe flasim për gjërat që na shqetësojnë. Por kurrë nuk e di plotësisht se çfarë efektesh mund të ketë kjo tek fëmijët. Prandaj është e rëndësishme të jesh aty për ta,” tha ai.
Kujtime nga e kaluara me Harry-n
Edhe pse nuk foli për marrëdhëniet aktuale me Princin Harry, William përmendi përvojat e tyre të përbashkëta nën vëmendjen e mediave.
“Shpresoj të mos kthehemi tek disa praktika të së kaluarës që unë dhe Harry i kemi përjetuar. Do të bëj gjithçka që të mos rikthehemi në atë situatë,” tha ai.
Një mesazh për të ardhmen
Në fund të intervistës, Princi William u shpreh se dëshiron të krijojë një botë për të cilën djali i tij të ndihet krenar.
“Jeta na vë në prova, dhe kjo është ajo që na formon. Jam krenar për bashkëshorten time dhe për babain tim, për mënyrën si kanë përballuar vitin e kaluar. Edhe fëmijët e kanë menaxhuar jashtëzakonisht mirë.”
Aktori Eugene Levy u shpreh i habitur nga sinqeriteti i Princit gjatë intervistës:
“Për mua ishte thjesht një bisedë, nuk e pashë si ndonjë ‘scoop’. Ai më tregoi mendimet e tij hapur, ishte një ditë surrealiste për mua,” tha Levy për BBC.
Burimi: BBC
Përktheu dhe përshtati: Katror.info
