Ndër veprat më të famshme në botë është romani i autorit të njohur George Orwell, romani i titulluar 1984. Në një botë distopike, ku ngjarjet zhvillohen në një të ardhme imagjinare në vendin e quajtur Airstrip One, që është provincë e shtetit Oqeania. Libri paraqet përpjekjen për ta ruajtur privatësinë e individualizmin në një epokë kur Partia në fuqi është në kontrollë të çdo gjëje, duke shfrytëzuar teknologji të avancuar që është në gjendje të vëzhgojë secilën lëvizje të qytetarëve.
Teatri Kombëtar i Kosovës ka njoftuar se dramatizimi i kësaj vepre është planifikuar të jetë premiera e parë e vjeshtës. Vepra e Orwell-it, punuar sipas vizionit të regjisorit francez me prejardhje polake, Igor Mendjisky, do të shfaqet para publikut kosovar më 30 shtator, me fillim në orën tetë të darkës. Duke folur për regjisorin Mendjisky, drejtori i TKK-së, Kushtrim Sheremeti, në prononcim për RTV21, tha se ai është një nga regjisorët më të njohur të teatrit në Francë. “Kemi kontaktuar me të që në vitin e kaluar gjatë festivalit të Avignon-it, ku jemi dakorduar për bashkëpunim” – është shprehur Sheremeti.
Në shfaqjen “1984” të TKK-së luajnë aktorët Adrian Morina, Arta Selimi, Basri Lushtaku, Edona Reshitaj, Flaka Latifi, Shpejtim Kastrati, Xhejlane Godanci, Ylber Bardhi. Pas premierës së të shtunës së 30 shtatorit, kjo shfaqje do të reprizoret gjatë muajit tetor, përkatësisht në datat 1, 5, 6, 7, 24, e 25 tetor. Teatri Kombëtar i Kosovës aktualisht është strehuar në Amfiteatrin e Pallatit të Rinisë, ku edhe realizohen shfaqjet teatrore.
Mundesh me e lexu edhe…
Prejse është publikuar romani 1984, ai ka tërhequr lexues të shumtë, që madje e kanë konsideruar si një vepër klasike e tepër e rëndësishme. Romani ka ngacmuar posaçërisht lexuesit e kohës moderne, të cilët tërheqin paralele duke krahasuar avacimin e teknologjisë dhe mundësisë që ka ajo për të përgjuar, potencialisht nga qeveritë me tendenca totalitare. Romani 1984 është botuar edhe në gjuhën shqipe dhe mbetet një nga librat më të shitur në disa librari në vend./Katror.info
Përgatiti:
