Komandanti i Forcës së Sigurisë së Kosovës (FSK), Gjenerallejtënant Bashkim Jashari, ka pritur në takim Gjeneral Major Michael E. Wegscheider, Komandant i Divizionit të 28-të të Këmbësorisë së Ushtrisë Amerikane, dhe Gjeneral Major Stephen Osborn, Agjutant i Përgjithshëm i Gardës Kombëtare të Ajovës.
Gjatë takimit, Komandanti Jashari i uroi mirëseardhje të dy gjeneralëve dhe i informoi për zhvillimet e fundit dhe sukseset e arritura nga FSK-ja. Ai theksoi rëndësinë e bashkëpunimit bilateral dhe aktivitetet e përbashkëta ndërmjet forcave tona.
Një pjesë e rëndësishme e bisedimeve ishte edhe përfshirja e FSK-së në ushtrimin shumëkombësh “Defender Europe 25”, ku Forca e Sigurisë së Kosovës është nikoqire në territorin e saj dhe merr pjesë edhe me kontingjente në Shqipëri, Maqedoni të Veriut dhe Kroaci.
Mundesh me e lexu edhe…
Gjithashtu, gjatë takimit u diskutua mbështetja e ushtrisë amerikane për validimin e Ekipit 2 të ROL 1, si dhe për trajnimin e përbashkët në Qendrën Kombëtare të Trajnimit në JRTC me Gardën Kombëtare të Ajovës.
Në përfundim të takimit, të dyja palët u zotuan për zgjerimin e bashkëpunimit në fusha të interesit të përbashkët, duke theksuar partneritetin strategjik dhe mbështetjen e vazhdueshme të SHBA-së për zhvillimin e mëtejmë të kapaciteteve të FSK-së./Katror.info
