Dje, më 28 shkurt në Bazel, neurokirurgu i njohur shqiptar, Edin Nevzati ka marrë zyrtarisht titullin e Docentit për neurokirurgji në Universitetin e Bazelit. Në një ceremoni të mbajtur për këtë rast para stafit universitar dhe mysafirëve – mes të cilëve edhe familjarët e tij – Nevzati ka marrë habilitimin gjegjësisht profesurën në Fakultetin e Mjekësisë në këtë universitet, shkruan albinfo.ch.
Si kurorëzim i këtij rrugëtimi të suksesshëm profesional vjen dhe lajmi më i ri, Nevzati që nga 4 marsi 2024, do të jetë edhe shef i departamentit te Neurokirurgjisë ne Denver si dhe profesor i neurokirurgjise në Universitetin e Denverit, Colorado, SHBA.
Edin Nevzati ka studiuar për mjekësi në Universitetin e Cyrihut. Pasi ka punuar në klinikat e neurokirurgjisë të spitaleve kantonale në Winterthur dhe Aarau si dhe në LUKS (Spitali Kantonal i Lucernit), ai u bë specialist në neurokirurgji në vitin 2016 dhe u avancua si mjek i lartë në neurokirurgji dhe kirurgji të shtyllës kurrizore, po në LUKS në Lucern.
Mundesh me e lexu edhe…
Nga viti 2017 deri në vitin 2019, dr. Edini ka thelluar njohuritë e tij shkencore dhe klinike me një bursë shkencore në Universitetin e Bernës dhe një bursë klinike në neuro-onkologji dhe kirurgji komplekse të shtyllës kurrizore në Universitetin e Kolorados, në Denver (SHBA).
Në vitin 2019 ai u kthye në LUKS si mjek i lartë në Neurokirurgji dhe kirurgji të shtyllës kurrizore. Në vitin 2020 u gradua mjek i lartë me funksion të veçantë dhe në nëntor 2023 si kryemjek.
Edin Nevzati ka përvojë të gjerë klinike dhe shkencore në fushën e onkologjisë kraniale dhe spinale.
Ai ka publikuar me dhjetëra publikime shkencore në revista prestigjioze të mjekësisë, në botë. Me emërimin e tij si pedagog privat në shtator 2023, Universiteti i Bazelit njeh arritjet e tij të jashtëzakonshme në kërkimin shkencor dhe mësimdhënien dhe i jep atij një licencë mësimdhënieje (Venia Docendi).
Nevzati është 41 vjeçar, i lindur në Prizren dhe prej më shumë se 30 vitesh jeton në Zvicër. Ai është baba i tre fëmijëve dhe njëri nga tre djemtë e Vllaznim dhe Luljeta Nevzatit, të cilët po ashtu kanë punuar në lëmin e shëndetësisë./Katror.info
Përgatiti:
