Ish-ministri i Mbrojtjes së Kosovës, Ejup Maqedonci, është nderuar me përfshirjen në Sallën e Famës (Hall of Fame) të Kolegjit të Luftës të Ushtrisë së Shteteve të Bashkuara (US Army War College) – një vlerësim i lartë që u jepet ish-studentëve që kanë kontribuar në mënyrë të jashtëzakonshme në fushën e mbrojtjes dhe udhëheqjes, shkruan Katror.info.
Në ceremoninë e mbajtur me këtë rast, i pranishëm ishte edhe Gjenerali Randy A. George, Shefi i Shtabit të Ushtrisë së SHBA-së.
Maqedonci e ka cilësuar këtë nderim si “një vlerësim jetësor” dhe ka theksuar se ai nuk përfaqëson vetëm një arritje personale, por edhe “pasqyrim të përkushtimit, profesionalizmit dhe përpjekjes së përbashkët të të gjithë atyre me të cilët kam pasur fatin të shërbej gjatë karrierës sime”.
Mundesh me e lexu edhe…
Ai ka shprehur mirënjohje ndaj Kolegjit të Luftës për mundësinë që i ishte dhënë për të përfunduar studimet atje, duke theksuar ndikimin që ajo përvojë ka pasur në formimin e tij profesional dhe personal. Po ashtu, Maqedonci ka falënderuar kolegët, mentorët dhe familjen për mbështetjen e tyre të vazhdueshme.
“Ky nderim më forcon bindjen në fuqinë e shërbimit, udhëheqjes dhe mësimit të përjetshëm — vlera që kapërcejnë kufijtë dhe bashkojnë të gjithë ata që i shërbejnë vendit dhe komunitetit të tyre,” ka deklaruar ish-ministri Maqedonci./Katror.info
