Hapja e një ekspozite që feston karrierën e Ozzy Osbourne në qytetin e tij të lindjes, Birmingham – shtëpia e grupit Black Sabbath – ishte një moment emocional për këngëtarin, tha bashkëshortja e tij, Sharon Osbourne.
Ajo e hapi zyrtarisht ekspozitën “Working Class Hero” në Muzeun dhe Galerinë e Artit të Birmingham-it.
“Nuk mund t’ju tregoj sa shumë e dua këtë,” tha ajo për ekspozitën e re. “Gjithçka ka ardhur nga ky qytet”.
Mundesh me e lexu edhe…
Pionierët e muzikës heavy metal, Black Sabbath, të formuar në Birmingham në vitin 1968, pritet të performojnë muajin tjetër në këtë qytet në një koncert ribashkimi shumë të pritur, që do të shënojë lamtumirën e tyre.
Në rrjetin X, grupi ka postuar një foto nga provat, ndërsa Osbourne ka deklaruar se koncerti në Villa Park do të ishte mënyra perfekte për t’u përshëndetur me publikun.
Ekspozita, e hapur falas për publikun, do të jetë e hapur deri më 28 shtator dhe përfshin çmime Grammy, disqe, fotografi dhe video që tregojnë rrugëtimin e Osbourne nga lagjja Aston deri te fama botërore.
Edhe pse karriera e grupit ka pasur sukses ndërkombëtar, Sharon tha se ishte thelbësore që ekspozita të hapej pikërisht në Birmingham.
“Nuk do të kishte kuptim ta hapnim në New York apo Los Angeles… sepse gjithçka nisi këtu dhe këtu është vendi i tij,” tha ajo për BBC Radio WM.
Ajo u duk e emocionuar teksa preu shiritin e zi për ta hapur zyrtarisht ekspozitën.
Ozzy Osbourne, 76 vjeç, ka qenë i detyruar të ndalojë në masë të madhe turnetë vitet e fundit për shkak të sëmundjes së Parkinsonit dhe problemeve në shtyllën kurrizore.
Megjithatë, Sharon tha se ai është i emocionuar për koncertin lamtumirës.
“Ai është i mahnitur… nuk mund ta besojë gjithë këtë dashuri që po merr nga qyteti,” tha Sharon për reagimin e Ozzy-t përpara koncertit.
“Është emocionues për të – është i lumtur që do të jetë sërish me djemtë e Sabbath, po kalojnë shumë mirë bashkë, por është e vështirë të thuash lamtumirë”.
Black Sabbath u themelua nga këngëtari Ozzy Osbourne, kitaristi Tony Iommi, basisti Terence “Geezer” Butler dhe bateristi Bill Ward./AP/Katror.info
