Themeluesi i Tesla-s, SpaceX dhe Neuralink, Elon Musk, ka thënë se robotët së shpejti do t’i tejkalojnë edhe kirurgët më të mirë njerëzorë. Musk komentoi për këtë nëpërmjet rrjetit social X, duke iu përgjigjur një postimi nga Mario Nawfal, themeluesi i “IBC Group” – një kompani investimi që investon në projekte blockchain dhe teknologji të reja.
“Robotët do t’i tejkalojnë kirurgët e mirë njerëzorë brenda pak vitesh dhe kirurgët më të mirë njerëzorë brenda rreth pesë vitesh”, tha Musk, duke theksuar përparimin e përshpejtuar të teknologjive robotike në mjekësi.
Ai theksoi gjithashtu rëndësinë e robotikës për punën e kompanisë së tij, Neuralink, e cila zhvillon teknologji për të lidhur trurin e njeriut me kompjuterët.
“Neuralink duhej të përdorte një robot për të implantuar elektroda sepse ishte e pamundur që një njeri të arrinte manualisht shpejtësinë dhe precizitetin e kërkuar”, shtoi miliarderi.
Robots will surpass good human surgeons within a few years and the best human surgeons within ~5 years. @Neuralink had to use a robot for the brain-computer electrode insertion, as it was impossible for a human to achieve the required speed and precision. https://t.co/ipPhQK8z1j— Elon Musk (@elonmusk) April 27, 2025
Rezultatet e Medtronic
Mario Nawfal, një sipërmarrës në fushën e kriptomonedhave dhe teknologjisë, iu referua rezultateve të fundit të testimit të sistemit robotik “Hugo”, të zhvilluar nga kompania mjekësore “Medtronic”. Testet u kryen në 137 operacione në jetën reale, duke përfshirë operacione të prostatës, veshkave dhe fshikëzës, dhe rezultatet ishin mbresëlënëse.
“Rezultatet ishin më të mira se ato të mjekëve”, vuri në dukje Nawfal, duke cituar një raport të publikuar nga “RTTNews”, shkruan Alsat.
Roboti Medtronic arriti rezultate jashtëzakonisht të mira: shkalla e ndërlikimeve ishte minimale – vetëm 3.7 përqind në operacionet e prostatës, 1.9 përqind në operacionet e veshkave dhe 17.9 përqind në operacionet e fshikëzës. Të gjitha këto norma ishin më të mira se objektivat e sigurisë të vendosura pas viteve të tëra kërkimesh.
“Roboti arriti një shkallë suksesi prej 98.5 përqind, që është shumë më lart se objektivi prej 85 përqind. Kjo do të thotë se jo vetëm që e kaloi testin, por edhe vendosi një standard të ri”, tha Nawfal.
Një asistent i shtrenjtë metalik si pjesë e ekipit mjekësor
Pavarësisht rezultateve mbresëlënëse, Nawfal theksoi se robotët nuk do t’i zëvendësojnë menjëherë kirurgët, por se ka shumë të ngjarë që ekipet mjekësore të ardhshme të përfshijnë robotët si një “asistent metalik shumë të shtrenjtë”.
“Nga 137 operacione, vetëm dy raste kërkuan ndërhyrje klasike kirurgjikale – njëra për shkak të një mosfunksionimi të robotit dhe tjetra për shkak të komplikacioneve specifike tek pacienti”, përfundoi Nawfal, duke ngritur pyetjen se sa shumë teknologjitë robotike do ta formësojnë industrinë mjekësore në vitet e ardhshme./Katror.info
