Në qytetin historik të Kiotos, në Japoni, po mbahet një nga ngjarjet më të rëndësishme shkencore të vitit – Konferenca Ndërkombëtare për Laserët, me pjesëmarrjen e mbi 60 universiteteve nga mbarë bota. Në mesin e emrave të njohur të mjekësisë dhe kërkimit shkencor, këtë vit Kosova përfaqësohet nga një figurë e njohur e mjekësisë shqiptare: Prof. Asoc. Dr. Venera Berisha-Muharremi, shkruan Katror.info.
Profesoresha e Fakultetit të Mjekësisë në Universitetin e Prishtinës është e ftuar në këtë konferencë si ligjëruese dhe anëtare e Komitetit Organizativ, duke sjellë në skenën ndërkombëtare rezultatet më të reja të kërkimit të saj: aplikimin e teknologjisë me laser për përmirësimin e funksionit të gjëndrës tiroide tek gratë që vuajnë nga hipotireoza dhe tiroiditi Hashimoto.
Ky prezantim shënon një moment të rëndësishëm për shkencën kosovare, duke treguar se inovacioni dhe përkushtimi në mjekësi nga profesionistët tanë, mund të zënë vend në platformat më prestigjioze globale.
Mundesh me e lexu edhe...
Prof. Venera Berisha-Muharremi është themeluese e Poliklinikës “Endomedica” në Prishtinë dhe profesoresha e parë në Kosovë me specializim në Mjekësi të Brendshme, Endokrinologji dhe Diabetologji. Me një përvojë të gjatë dhe të pasur në trajtimin e sëmundjeve endokrine, ajo ka qenë gjithashtu drejtoreshë e Klinikës së Endokrinologjisë në QKUK gjatë viteve 2018-2021.
Ajo ka doktoruar në Universitetin e Zagrebit dhe ka ndjekur specializime në institucione elitare si Universiteti i Harvardit, Oksfordit, Perugias dhe në Izrael. Përmes punës së saj të palodhur dhe vazhdimisht të përditësuar me zhvillimet më të fundit shkencore, Dr. Berisha-Muharremi ka bërë që Kosova të renditet mes pesë qendrave botërore që ofrojnë terapi me laser për tiroiditin Hashimoto.
Përveç aktivitetit të saj profesional, ajo njihet edhe për botime të shumta shkencore dhe për përfaqësimin dinjitoz të Kosovës në konferenca ndërkombëtare në fushat e endokrinologjisë, diabetit dhe obezitetit. Jashtë fushës së mjekësisë, Prof. Venera është nënë e dy fëmijëve dhe njihet për dashurinë e saj ndaj udhëtimeve dhe modës.
Kontributi i saj në këtë konferencë është jo vetëm një arritje personale, por edhe një dëshmi se shkenca kosovare ka zë, vizion dhe vend në botë./Katror.info
