Erzë Dinarama do të përfaqësojë Kosovën në Ekspozitën e 19-të Ndërkombëtare të Arkitekturës në Bienalen e Venecias, e cila do të mbahet nga 10 maji deri më 23 nëntor 2025, shkruan Katror.info.
“Ishte kënaqësi të dëgjojmë nga vet autorja idenë, vizionin e përgatitjet që po bëhen për pjesëmarrjen në këtë ngjarje shumë të rëndësishme”, u shpreh Ministri i Kulturës, Hajrullah Çeku në rrjetet sociale.
Gjithashtu ai theksoi rëndësinë e projektit të Erza Dinaramës si reflektim mbi ndryshimet klimatike dhe ndikimin e tyre në ekosistemet lokale.
Mundesh me e lexu edhe…
“Me projektin ‘Ansamble në shpërfaqje: Ekologjitë në ndryshim’ Erza trajton një temë shumë të veçantë, eksploron ekologjitë në ndryshim të shkaktuara nga klima dhe zonat klimatike, kjo përmes pëshkrimeve të erërave nga fermerët tanë.”, shkroi tutje Ministri i Kulturës, Hajrullah Çeku në rrjetet sociale.
Projekti i Dinaramës, “Ansamble në shpërfaqje: Ekologjitë në ndryshim”, eksploron ndikimet e ndryshimeve klimatike dhe migrimin e specieve në ekosistemet lokale. Duke u angazhuar me tensionet midis mjeteve shkencore globale dhe realiteteve socio-ekologjike lokale, instalacioni kritikon zgjidhjet universale dhe përqafon pasigurinë e peizazheve në ndryshim. Ky projekt synon të hapë mundësi për transformim dhe bashkëpunim në përballjen me sfidat mjedisore.
Erzë Dinarama është arkitekte, dizajnere ndërdisiplinore dhe hulumtuese që ndërthur urbanizmin, arkitekturën e peizazhit dhe ekologjinë. Ajo eksploron sfidat mjedisore përmes shkencës dhe dizajnit, duke i bërë të dukshme përmes qasjeve estetike.
Ka qenë e angazhuar në institucione si Politekniku i Milanos dhe Torinos, ETH Zurich dhe Universiteti Polis në Tiranë, ndërsa hulumtimet e saj janë publikuar nga Routledge dhe prezantuar në konferenca të njohura. Në praktikën profesionale ka bashkëpunuar me Carlo Ratti Associati, Fondacionin Manifesta dhe Studio Olafur Eliasson, si dhe ka qenë pjesë e projekteve të rëndësishme urbanistike.
Ka përfunduar studimet në Universitetin e Prishtinës, Politecnico di Milano dhe UC Berkeley, me specializim në tranzicionin socio-ekologjik në ETH Zurich dhe EPFL. Si themeluese e Institutit SRD, ajo udhëheq një qendër ndërdisiplinore për sfidat ekologjike dhe aktualisht është artiste në rezidencë në projektin S+T+ARTS4WaterII të BE-së.
Bienalja e Arkitekturës në Venecia është një nga ekspozitat më të rëndësishme ndërkombëtare në fushën e arkitekturës, e cila mbahet çdo dy vjet në Venecia, Itali. Kjo ngjarje shërben si platformë ku arkitektë nga mbarë bota prezantojnë punimet dhe idetë e tyre novatore, duke adresuar çështje aktuale dhe të ardhshme në arkitekturë dhe urbanizëm.
Pjesëmarrja e vazhdueshme e Kosovës në Bienalen e Venecias tregon përkushtimin e vendit në promovimin e arkitekturës dhe kulturës së tij në skenën ndërkombëtare./Katror.info
Përgatiti:
