Profilet e personaliteteve në diasporë, në fusha të ndryshme, po shtohen dita e ditës bashk me sukseset e të tyre që i arrijnë në shtetet ku ata jetojnë.
Bëhet fjalë për Eugjen Gargjola, i cili është violinist i njohur shkodran që prej vitesh jeton dhe punon në Mantova të Italisë.
Ai emigroi në Itali në moshën 15-vjeçare, ku vijoi studimet për violinë në Konservatorin e Mantovës. Eugjeni ka shëtitur për të luajtur në violinë në 28 shtete të botës, duke fituar eksperienca të reja, por dhe emocione nga publiku i huaj.
Mundesh me e lexu edhe…
“Unë vij nga një familje muzikantësh, të cilët më kanë adresuar te kjo rrugë. Gjyshi im Ndoc Shllaku ka qenë violinist i mirënjohur dhe profesor i shkollës së muzikës në Shkodër, spala e orkestrës së Teatrit Migjeni. Kur ishte opera e parë “Mrika” e Prenk Jakovës, aty fillova leksionet e para në moshën katër vjeçare. Siç duket kanë dalluar te unë një talent dhe u dashurova me muzikën në përgjithësi, kryesisht me violinën sepse gjyshi më transmetoi dhe dashurinë për këtë rrymë kaq të bukur, që e gëzon jetën personale të muzikantit por dhe të tjerëve”, shpehet Gargjola.
Gjithashtu ai ka bashkëpunuar me emra të njohur të muzikës në botë, si kompozitorin e famshëm, Enio Moricone dhe Luçiano Pavaroti. Gargjola ka luajtur drejtpërdrejt si solist në emisionin “Pinocchio” të televizionit RAI 2.
“U regjistrova në konservatorin e Mantovës, ku jetoj akoma sot. Studimet e mia në Shkodër përsa i përket nivelit ishin sinqerisht të larta, sepse shkolla e muzikës ishte shumë serioze në ato vite. Kontakti me profesorët këtu ishte shumë pozitiv dhe unë vazhdova studimet me nota shumë të mira deri në arritjen e diplomës të konservatorit në vitin 1998. Kam marrë notën 10 me lavdërime dhe ishte hera e parë që kjo notë jepej me shumë emocion. Kjo nuk do të thotë se unë atë ditë arrita maksimumin, por përkundrazi ajo ishte fillimi i karrierës, sepse në vitet në vazhdim jam impenjuar edhe më shumë”, shprehet tutje Gargjola.
Aktualisht punon si profesor i muzikës në liceun muzikor të Mantovës.
“Para 20 viteve kam bërë një audicion me orkestën e kompozitorit të mirënjohur të muzikës së filmave Ennio Moricone. Fitova konkursin dhe punova me të disa muaj në disa koncerte. Ka qenë një eksperiencë shumë pozitive për mua. Gjithashtu kam luajtur me Luciano Pavarotin në koncertin e tij të madh në Mantova, ku u njohëm dhe kam punuar me të dhe tre vite të tjera në vazhdim nëpër turne të ndryshme. Këta janë muzikantët që njihen më shumë në botë. Kam luajtur dhe muzikë të lehtë te “Pavaroti and friends”, ku pjesëmarrës ishte i famshmi Xhorxh Majkëll dhe grupi “Deep Purple”. Eksperienca ime muzikore në këto vite nuk është përqëndruar vetëm te muzika klasike, sepse kam përqafuar dhe rryma të tjera siç është muzika xhaz, gjithnjë të niveleve të mirëfillta”, tregon violinsiti shkodran.
Në pyetjen se a e viziton Shqipërinë shpesh dhe a e merr malli për vendlindjen, violinsti u shpreh se ka pasur raste edhe kur ka dhënë kontribut në fushën e kulturës në Shkodër.
“Kur kam ikur në vitet e para kisha një mall shumë të madh, gati ekstrem për vendin tim, ku mendoja se një ditë do të kthehem për të dhënë kontributin tim ose të bashkëjetoj me shokët e dikurshëm. Unë praktikisht kam organizuar para disa viteve festivalin e muzikës moderne në Shkodër, kam patur kontakte me qytetin e Shkodrës. Një ditë realizova ëndrrën time, që ishte të kthehem. Fitova konkursin për të punuar si profesor në konservatorin e Shkodrës kur u hap para disa viteve, por ai konservator u mbyll pas një viti dhe unë mbeta pa këtë rol në Shkodër. Pastaj kam punuar në Bashkinë e Shkodrës si drejtor i kulturës, ku organizova koncerte të ndryshme. Ndërkohë që në një moment me ndryshimin e kryetarit të bashkisë u mbyllën shumë rrugë, dhe vendosa të rikthehem në Itali. Aktualisht punoj si profesor në liceun muzikor të Mantovës”, përfundon Gargjola./Katror.info
Përgatiti:
