Deputeti austriak në Parlamentin Evropian, Lukas Mandl, do të zhvillojë të premten, më 28 mars, një vizitë në Universitetin e Prishtinës, ku do të takohet me rektorin Arben Hajrullahu dhe do të mbajë një diskutim me të pranishmit në Sallën e Senatit, shkruan Katror.info.
Diskutimi, i cili do të zgjasë një orë duke filluar nga ora 12:30, do të fokusohet në integrimin e Kosovës në Bashkimin Evropian, sfidat dhe perspektivat e saj.
Mandl, një mbështetës i kahershëm i Kosovës dhe anëtar i Grupit të Partive Popullore Evropiane në Parlamentin Evropian, ka qenë aktiv në promovimin e çështjes kosovare në arenën ndërkombëtare. Në vitin 2021, ai publikoi librin “Kosova dhe BE-ja — Gjendja aktuale”, në të cilin paraqiten qëndrimet e personaliteteve evropiane dhe kosovare mbi raportet mes Kosovës dhe BE-së. Libri u botua në katër gjuhë: shqip, serbisht, anglisht dhe gjermanisht.
Mundesh me e lexu edhe…
Për kontributin e tij, Mandl u nderua nga Presidentja Vjosa Osmani me “Medaljen Presidenciale të Meritave” në 17-vjetorin e shpalljes së pavarësisë së Kosovës. Ai është gjithashtu një nga themeluesit e Shoqatës së Miqësisë Kosovë – Austri.
Përveç vizitës në Universitetin e Prishtinës, Mandl do të mbajë një diskutim edhe në Universitetin e Gjilanit “Kadri Zeka”, i cili në vitin 2023 e nderoi atë me titullin “Doktor Nderi”./Katror.info
Përgatiti:
