Duoja shqiptare “Shkodra Elektronike”, e përbërë nga kantautori dhe producenti Kolë Laca dhe këngëtarja-kantautore Beatriçe Gjergji, do të përfaqësojë këtë vit Shqipërinë në Eurovision me këngën “Zjerm”.
Eurovision.tv, faqja zyrtare e festivalit evropian të këngës, i ka kushtuar një shkrim të detajuar grupit elektrofolk, duke theksuar stilin e tyre unik, që bashkon muzikën tradicionale shkodrane me tinguj modernë elektronikë.
Siç raporton Eurovision.tv, momenti më i paharrueshëm për “Shkodra Elektronike” ka qenë koncerti i tyre i parë në Kosovë. Megjithëse aktualisht jetojnë në Itali, ata u rikthyen në Shqipëri për të konkurruar në Festivalin e Këngës, ku triumfuan për të siguruar biletën për në Eurovision.
Grupi, i krijuar në vitin 2019, ka sjellë një risi në muzikën shqiptare, duke përzier këngët tradicionale të Shkodrës me ritme bashkëkohore. Deri tani kanë publikuar katër këngë dhe një EP të regjistruar live në studio, ndërsa kanë performuar në festivale të ndryshme evropiane. Përveç pjesëmarrjes në Eurovision, ata janë duke punuar edhe për albumin e tyre debutues, i cili përfshin Korin Shqiptar të Iso-Polifonisë, një trashëgimi kulturore e mbrojtur nga UNESCO.
Në gjysmëfinalen e parë të Eurovisionit, më 13 maj, Shqipëria do të performojë e 12-ta në radhë, duke synuar të sigurojë një vend në finalen e madhe të këtij festivali prestigjioz./Katror.info
Përgatiti:
