Në Ditën Botërore të Kontrollit të Fakteve, Organizata joqeveritare Action for Democratic Society (ADS) dhe Hibrid.info organizuan një panel diskutimi me temën “Sfidat e çrregullimit informativ në Kosovë”, raporton Ekonomia Online.
Gjatë këtij paneli, hulumtuesi i Hibrid.info, Festim Rizanaj, theksoi se platformat sociale, si Facebook dhe TikTok, janë burimet kryesore të dezinformimit, duke e bërë më të vështirë verifikimin e informacionit.
“Niveli i ulët i edukimit medial ndikon që qytetarët të mos kenë aftësi të mjaftueshme për të dalluar informacionin e saktë me atë të rremë. Polarizimi politik vërehet në rrjete sociale, ku në faqe të caktuara ndikojnë që audienca të mos verifikojë ato për shkak të përkatësive politike të audiencës. Një faktor tjetër është edhe ai socio-ekonomik. Papunësia e rrit ndjeshmërinë e shoqërisë ndaj dezinformimit në përgjithësi. Në media sociale zhvillohet dezinformomi. Nëse e bëjmë me përqindje një lloj mesatareje 25 për qind në media reale dhe pjesa tjetër është në media sociale. Facebook mbetet platforma më e përdorur, ku keqinformimi ka dëmtuar më së shumti, por prej shpalljeve të zgjedhjeve TikToku ka qenë një prej platformave që ia ka kaluar Facebook, mbetet si burimi kryesor i dezinformatave në media sociale”, tha Rizanaj.
Mundesh me e lexu edhe…
Kryetari i Asociacionit të Gazetarëve të Kosovës, Xhemail Rexha, foli për rëndësinë e verifikimit të fakteve nga gazetarët, duke theksuar se në Kosovë mungon një departament i dedikuar për këtë proces.
“Detyrat kryesore të gazetarëve janë që të verifikojnë informata që ata i plasojnë për këdo që është në profesionin e gazetarisë. Ajo që mungon në Kosovë është që nuk ka një departament të veçantë të verifikimit të fakteve dhe të luftimit të dezinformatave. Secila duhet ta ketë një filtër para se t’i plasojnë informata dhe e dimë që mediat e ndryshme, jo vetëm në botë, por edhe në rajon ka departament i veçantë, që merret me verifikimin e fakteve dhe informatat që gazetarët e tyre i sjellin në redaksinë e tyre në mënyrë që të mos ketë shpërndarje të informatave të pasakta apo të dezinformojnë. Ajo çfarë kemi provuar të bëjmë është që të ndihmojmë që gazetarët të përgatiten më mirë profesionalisht edhe në aspektin e verifikimit tw fakteve nëpërmjet projekteve të ndryshme”, tha Rexha. /Ekonomia online/Katror.info
Përgatiti:
