Festivali Ndërkombëtar i Artisteve dhe Aktivisteve, FemArt, e përmbylli me sukses edicioni i tij i 12-të, i cili u zhvillua nga data 25 deri më 30 shtator.
Me moton “MOTËRZIMI: n’Kohë Lufte dhe Paqe”, festivali ofroi një platformë të pasur për artin, kulturën dhe aktivizmin, duke bashkuar artistë dhe aktivistë nga 15 vende të ndryshme.
Gjatë gjashtë ditëve, FemArt prezantoi 30 aktivitete të ndryshme, duke përfshirë punëtori, konferenca, shfaqje teatrale, filma dhe ekspozita, të cilat krijuan një atmosferë të pasur artistike dhe kulturore.
Mundesh me e lexu edhe...
Ky edicion u karakterizua nga një ndjesi e fortë solidariteti dhe bashkëpunimi, duke theksuar rëndësinë e artit si mjet për ndryshim social dhe kulturor.
Momentet kulminante të festivalit përfshinin diskutime të pasura në panelet e organizuara, ku artistët ndanë përvojat e tyre dhe trajtuan tema të rëndësishme, si solidariteti dhe rëndësia e artit në kohë krize.
FemArt 12 ishte një mundësi për të krijuar lidhje mes kulturave të ndryshme, me pjesëmarrës që erdhën nga vende si Kina, Anglia, Franca dhe Argjentina. Kjo përfaqësim i gjerë tregoi se arti nuk njeh kufij dhe se fuqia e tij mund të bashkojë njerëzit në të gjitha anët e botës.
Me një atmosferë të ngrohtë dhe mbështetje të madhe nga publiku, festivali përfundoi me koncert fantastik nga Vjollca Robelli- Mripa, më muzikë të vjetër shqipe të punuara në tingujt xhaz.
FemArt 12 la pas një trashëgimi të pasur dhe një mesazh të fortë: arti është një forcë transformuese që mund të inspirojë dhe të sjellë ndryshime pozitive në shoqëri. Një festival që tregoi se, edhe në kohë sfidash, kultura dhe solidariteti janë armët më të forta që kemi./Katror.info
