Të enjten (24 tetor 2024) ka nisur rrugëtimi trinetësh i Festivalit të Këngës në Radiotelevizionin e Kosovës. Këtë eidcion është i padiskutueshëm shkëlqimi i skenës dhe i ngjarjes.
Festivalin në natën e parë e kanë prezantuar kantautori Genc Salihu dhe aktroja Drita Kabashi, derisa krahas 16 këngëve konkurrente këtë mbrëmje në skenë janë ngjitur edhe Ylli Limani, Elita 5 dhe Aurela Gaçe.
Para intros së Festivalit janë lexuar poezi të Gjergj Fishtës, Faik Konicës, Fan Nolit, Atë Zef Pllumit e Ukshin Hotit. Janë poezi për realitetet që i përgjigjen edhe kohës së sotme. Thërrasin për unitet kombëtar.
Mundesh me e lexu edhe...
“Për mëmëdhenë” ka qenë instrumentali i interpretuar me kitarë elektrike.
Trofeu fitues i këtij edicioni është ‘Diamanti Blu’, që është një simbolikë për Kosovën, flamurin dhe kaltërsinë e saj. Ndërkohë, juria e festivalit përbëhet nga Minire Fetahut, redaktore e muzikës në RTK, Jane Sugarman, muzikologe dhe njohëse e muzikës shqiptare, Ardianë Pajaziti, drejtoreshë e portalit për art dhe kulturë “KultPlus”, Valbona Selimllari, prezantuese dhe Blerta Zeqiri, regjisore.
Në festival kanë performuar 16 artistë, duke nisur me Dea Stricën me këngën “N’Shqipni”, për të vazhduar me Greta Azizi me “Veres”, Agim Poshka me “Ndarja erdhi”, Jehona Lumi me “Shko”, Inorga me “Seks mashina nga Prishtina”, Rei Bezhani me “Zonjë tradhti”, Ardita Begu me “Fundosu në dritë”, Besmir Shishko me “Unë Ajo”, Blendi Kaso me “Një të vetme ka në jetë”, Endrit Krasniqi me “Flasë me gjethen”, Ardit Stafaj “Faji”, Santino De Bartola me “Unë jam Arbëresh”, Arnite Kastrati me “Blla blla”, Vlona Boshnjaku me “Lotët”, Luna Qausholli me “Dielli të më shoh” dhe Bruna Sata me këngën “Ti je i pashpirtë”.
Gjashtëmbëdhjetë këngë garojnë në edicionin e sivjetmë të Festivalit të Këngës në RTK. Edhe në natën e dytë (të premten) do të interpretohen të gjitha këngët garuese, e gjysma prej tyre do të përzgjidhen për natën finale, të shtunën mbrëma. Grupi “Lindja”, këngëtari Alban Skënderaj e artisti shqiptar me emrin skenik Stanaj, janë paralajmëruar si mysafirë të radhës.
Në skenë u ngjit edhe fituesi i edicionit të kaluar La Fazani me këngën “Oj Kosovë”, derisa një interpretim të shkëlqyeshëm e pati prezantuesja e festivalit, aktorja Drita Kabashi, e cila këndoi këngën “Mallëngjimi” të kënduar dikur nga Muharrem Qena.
Fituesi i edicionit të parë, Arbër Salihu (La Fazani) para fillimit të edicionit të dytë u shpreh se është ndjenjë e mirë të kthehet në këtë event, por tani si spektator.
“Është sukses i jashtëzakonshëm që kemi arritur ta bëjmë këtë festival dhe po më bëhet zemra mal që po ka vazhdimësi. Shpresoj që do të shkojë duke u bërë mirë e më mirë çdo vit. Definitivisht është ndjenjë fantastike të jesh pjesë e këtij festivali. Për mua ka qenë një gjë shumë e bukur që më ka ndodhur në karrierën time. Vitin e kaluar krejt java e festivalit është që s’do ta harroj. Përmes këtij festivali kam njoftuar shumë njerëz që më kanë shërbyer gjatë tërë vitit për bashkëpunime të ndryshme. Skena është shumë e mirë dhe të performosh në një këso skene madhështore gjithsesi që ka qenë kënaqësi e madhe”, ka theksuar Salihu.
Nata e dytë mbahet të premten në orën 21:00, derisa nata finale të shtunën në të njëjtën kohë./Katror.info
Përgatiti:
