Festivali i Teatrove në Suharekë rikthehet këtë shtator me edicionin e tij të gjashtë.
Duke sjellë pesë netë të pasura me art skenik dhe diversitet kulturor. Nga data 8 deri më 12 shtator, publiku do të ketë mundësinë të ndjekë pesë shfaqje teatrore nga trupa të njohura nga mbarë hapësira shqiptare.
Në një intervistë për Albanian Post themelues i festivalit Brahim Basha theksoi se puna për këtë festival nis shumë më herët.
Mundesh me e lexu edhe…
“Shfaqjet janë përzgjedhur nga komisioni prej tre anëtarëve, profesionistë të artit dramatik, të cilët kanë shkuar dhe i kanë përcjellë të gjitha shfaqjet teatrore në rajon”, tha Basha.
Me karakter kombëtar, festivali këtë vit mirëpret Teatrin Kombëtar të Shkupit, Teatrin Kombëtar të Kosovës, Teatrin e Gostivarit, Teatrin e Preshevës dhe Teatrin “Bekim Fehmiu” nga Prizreni – duke e kthyer Suharekën në një pikë takimi të pasionit për teatrin dhe bashkimit përmes artit.
“Festivali i Teatrove në Suharekë luan rol të rëndësishëm në ngritjen e vetëdijes dhe nevojës për zhvillimin e aktiviteteve kulturore, gjegjësisht teatrore në komunën e Suharekës. Këtu prezantohen artistë nga: Shqipëria, Maqedonia, Presheva, Kosova”, u shpreh artisti.
Pas pesë edicionesh të mbajtura në ambientet e vogla por plot histori të Shtëpisë së Fellbahut, Festivali i Teatrove në Suharekë po hyn në një kapitull të ri.
Këtë vit, për herë të parë, festivali zhvendoset në një hapësirë moderne, në objektin e ri të Shtëpisë së Kulturës – një zhvillim që sinjalizon rritjen dhe seriozitetin e këtij organizimi kulturor.
Kjo hapësirë e re jo vetëm që i jep festivalit një dimension të ri logjistik dhe estetik, por shënon edhe ambicien për ta bërë Suharekën një pikë referimi të rëndësishme në hartën teatrore të Kosovës.
“Ky Festival, për pesë vite është mbajtur në objektin Shtëpia e Fellbahut në Suharekë; këtë edicion mbahet në objektin e ri të Shtëpisë së Kulturës. Objekti ka 820 ulëse, që do të jetë sfiduese për ta mbushur me shikues”, deklaroi Basha.
Festivali i Teatrove në Suharekë vazhdon të dëshmojë se arti skenik nuk njeh kufij, por bashkon kultura, gjuhë dhe emocione.
Me një përkushtim të palëkundur ndaj cilësisë dhe me një vizion gjithnjë e më të gjerë, ky festival po kthehet në një urë të rëndësishme kulturore mes trojeve shqiptare.
Suhareka e pret artin – dhe publiku, si gjithmonë, është zemra që e mban gjallë këtë festival./AlbanianPost/Katror.info
