Filharmonia e Kosovës ka njoftuar se do të organizojë një koncert të veçantë më 17 shkurt, si pjesë e agjendës zyrtare për shënimin e 17-vjetorit të Pavarësisë së Republikës së Kosovës.
Kori dhe Orkestra e Filharmonisë së Kosovës do të sjellin një program me vepra të kompozitorëve nga Kosova, nën dirigjimin e Baki Jasharit.
“Koncerti do të nisë me veprën “Suita ilire” nga Mark Kaçinari, në kuadër të 90-vjetorit të lindjes së kompozitorit, dhe do të përfshijë tri vepra premierë: “Fantazi për piano” nga Blond Krasniqi, me solist Shkëlzen Baftiarin (piano), poema simfonike “Mizer – Reçak” nga Librun Jupolli, dhe kantatën “I miri i motrës” nga Korab Shaqiri, me soliste Flaka Goranci (mexosoprano)”, thuhet në njoftim.
Mundesh me e lexu edhe…
Gjithashtu, do të interpretohen “Dies Irae” (Messa da Requiem) nga Giuseppe Verdi dhe “Vendi im” nga Valton Beqiri, e kompozuar mbi temën e këngës “Mallëngjimi”.
Koncerti do të mbahet në Sallën e Kuqe të Pallatit të Rinisë në Prishtinë, dyert do të hapen në orën 19:30, ndërsa koncerti do të fillojë në orën 20:00.
Për shkak të numrit të kufizuar të ulëseve, Filharmonia e Kosovës inkurajon rezervimin e vendeve për këtë ngjarje të veçantë. /Katror.info
Përgatiti:
