Sot ka nisur regjistrimi falas në Bibliotekën “Hivzi Sulejmani” në lagjen Dardani si dhe në degët e saj në Ulpianë dhe Taukbashçe, në kuadër të aktiviteteve për shënimin e Ditës së Çlirimit të Kryeqytetit. Qytetarët janë mirëpritur me përkushtim nga stafi i bibliotekës, ndërsa interesi për t’u bërë pjesë e kësaj qendre kulturore duket të jetë më i madh se zakonisht, shkruan Katror.info.
Ndër vizitorët e rregullt të bibliotekës është edhe Urtina, studente e vitit të pestë të Fakultetit të Mjekësisë, e cila përgatitet për provime në hapësirat e bibliotekës. Ajo shprehet e kënaqur me ambientin e qetë dhe të përshtatshëm për studim.
Për herë të parë, në bibliotekë u regjistruan edhe dy vëllezër simpatikë binjakë, Mal dhe Dren Kllokoqi, të cilët sapo kanë përfunduar maturën dhe janë në përgatitje për provimin pranues në Fakultetin e Mjekësisë. “Po na pëlqen hapësira dhe besojmë që do të studiojmë këtu”, u shprehën ata me entuziazëm.
Mundesh me e lexu edhe…
Regjistrimi falas do të vazhdojë deri në orën 16:00 dhe është mundësuar me përkushtimin e kolegeve të bibliotekës: Fikrija, Linda, Nora dhe Dafina, të cilat po kujdesen që çdo lexues të ndihet i mirëpritur.
Në ndërkohë, dega e bibliotekës në Ulpianë është rikthyer në funksion pas një rinovimi të plotë. Me një pamje të freskët dhe atmosferë të ngrohtë, ajo po shndërrohet në një qendër të dashur për fëmijët dhe të rinjtë e lagjes.
Kjo nismë e Bibliotekës së Qytetit të Prishtinës synon të promovojë kulturën e leximit dhe të forcojë lidhjen e komunitetit me librin në një ditë me simbolikë të veçantë për kryeqytetit./Katror.info
