Sot kanë filluar punimet për modernizimin e njësisë Termocentralit Kosova B, një investim i rëndësishëm i realizuar nga Korporata Energjetike e Kosovës (KEK).
Me rastin e fillimit të punimeve, termocentrali u vizitua nga Kryeministri në detyrë, Albin Kurti, dhe Ministrja në detyrë e Ekonomisë, Artane Rizvanolli, të cilët u pritën nga Ushtruesi i Detyrës së kryeshefit të KEK-ut, Gramos Hashani.
Ky projekt përbën një hap të rëndësishëm në përmirësimin e infrastrukturës energjetike të Kosovës, pasi për herë të parë janë duke u realizuar riparimet dhe modernizimet e nevojshme në Termocentralet ekzistuese të KEK-ut. Puna do të kontribuojë në rritjen e kapacitetit të prodhimit, me një shtesë vjetore prej mbi 600 GWh, si dhe do të mundësojë një operim më efikas dhe të sigurt të njësive të TC Kosova B.
Mundesh me e lexu edhe…
“Unë ju përgëzoj shumë për këtë modernizim të turbinave në Termocentralin Kosova B, edhe të njësisë B1 edhe B2, të cilat janë të sekuencura në kohë, në mënyrë që ta kemi maksimumin e prodhimtarisë, po në të njëjtën kohë ta shtojmë edhe prodhimtarinë edhe sigurinë, edhe efikasitetin, e ta ulim ndotjen”, tha kryeministri Kurti gjatë vizitës, sipas njoftimit për shtyp nga Zyra e Kryeministrit.
Ai në veçanti e uroi menaxhmentin dhe punëtorët e KEK-ut, që ky investim prej 56.5 milionë euro po financohet nga vetë KEK-u, prej të cilit do të kemi shtesë prodhimtari të energjisë prej 600 GWh, gjë që përbën lajm të mirë për qytetarët, industrinë dhe ekonominë tonë.
Ministrja Rizvanolli tha se kur të përfundojnë të gjitha punimet për rehabilitimin e Termocentralit Kosova B, jetëgjatësia e tij do të shtohet edhe për 20 vjet, ndotja nga pluhuri dhe oksidet e azotit do të ulën për 60%, kurse remontet kapitale do të nevojiten që të bëhen një herë në 10 vjet, në vend se çdo pesë vjet. Kjo do të thotë se siguria e furnizimit do të përmirësohet dukshëm për 20 vitet e ardhshme, importi do të ulët për së paku 23 milionë euro, ndërkaq eksporti do të rritet për së paku 20 milionë në vit, shtoi ajo.
Ky modernizim i rëndësishëm do të kontribuojë në përmbushjen e kërkesave mjedisore dhe do të sigurojë përputhshmërinë me standardet e Bashkimit Evropian për emisionet e pluhurit dhe gazrave, duke përmirësuar gjithashtu efikasitetin e prodhimit të energjisë në Kosovë./Katror.info
