Komisioni Qendror i Zgjedhjeve nisi procesin e shkatërrimit të materialit zgjedhor të përdorur në zgjedhjet e mbajtura më 9 shkurt 2025, raporton Ekonomia Online.
Shkatërrimi i materialit të zgjedhjeve të 9 shkurtit 2025, që ishte paraparë të fillonte në orën 10:00 në Qendrën e Numërimit dhe Rezultateve, nuk nisi me kohë, për shkak të mosfunksionimit të pajisjeve.
Shkatërrimi i materialit të zgjedhjeve bëhet në përputhje me afatet ligjore dhe procedurat e përcaktuara për ruajtjen dhe më pas asgjësimin e materialit zgjedhor, pasi është përmbyllur tërësisht procesi i shqyrtimit dhe certifikimit të rezultateve.
Mundesh me e lexu edhe…
Pas gjysmë ore vonesë Komisioni Qendror i Zgjedhjeve ka filluar shkatërrimin e fletëvotimeve dhe materialeve të tjera zgjedhore që i takojnë Zgjedhjeve për Kuvendin e Kosovës, të cilat u mbajtën më 9 shkurt 2025.
Ky aktivitet i KQZ-së u zhvillua në Qendrën e Numërimit dhe Rezultateve.
Zëdhënësi i KQZ-së, Valmir Elezi, ka thënë para mediave se materialet zgjedhore që do të shkatërrohen i takojnë të gjitha fazave të procesit zgjedhor.
“Shkatërrimi i materialit zgjedhor është detyrim ligjor për Komisionin Qendror të Zgjedhjeve. Sipas vendimit të KQZ-së, pjesë e materialit që do të shkatërrohet janë fletëvotimet, formularët e rezultateve, listat e votuesve dhe materiale të tjera, përfshirë edhe ato administrative. Të gjitha këto materiale janë përdorur jo vetëm në ditën e zgjedhjeve, por edhe gjatë fazave të ndryshme të procesit zgjedhor, para dhe pas 9 shkurtit”, tha Elezi.
Më tej, ai tregoi se nga ky proces do të përjashtohen materialet e vendvotimeve që janë objekt i hetimit nga institucionet shtetërore dhe disa materiale që do t’i shërbejnë KQZ-së për qëllime të trajnimit të stafit të zgjedhjeve të ardhshme.
“Materiali zgjedhor i cili është objekt i shqyrtimit apo hetimit nga institucionet e drejtësisë, nuk do të shkatërrohet, por do të ruhet deri në përfundimin e të gjitha procedurave ligjore. Gjithashtu, edhe një pjesë tjetër e materialit zgjedhor do të ruhet nga KQZ dhe kjo bëhet për qëllime të trajnimit të stafit, i cili do të angazhohet në proceset e ardhshme zgjedhore”, tha Elezi./EO/Katror.info
