Fushata zgjedhore për zgjedhjet parlamentare të 11 majit ka nisur zyrtarisht sot, duke shënuar një garë të ashpër mes partive kryesore dhe koalicioneve përfaqësuese në skenën politike shqiptare.
Partia Demokratike dhe koalicioni “Aleanca për Shqipërinë Madhështore” e hapën fushatën me një tubim në sheshin “Nënë Tereza”, ku figura qendrore ishte Chris Lacivita, strateg politik amerikan që pritet të drejtojë fushatën e PD-së nga afër.
Ndërkohë, Partia Socialiste ka zgjedhur një qasje më të decentralizuar për ditën e parë të fushatës, duke zhvilluar takime në të 12 qarqet e vendit, me në fokus gratë – një kategori që PS e konsideron si themel të mbështetjes së saj elektorale, por edhe si faktor të rëndësishëm në përfaqësimin politik. Fushata qendrore e socialistëve do të hapet nesër, më 12 prill në orën 12:00, një orar i përzgjedhur në mënyrë simbolike për të përkujtuar 12 yjet e flamurit të Bashkimit Evropian – destinacion që PS e vendos në qendër të programit të saj me moton: “Shqipëria 2030 në BE”.
Mundesh me e lexu edhe…
Nga ana tjetër, edhe Lulzim Basha do të çelë zyrtarisht fushatën e tij më 12 prill, por një orë më herët se socialistët, duke kërkuar të ruajë një profil të pavarur në kuadër të koalicionit euroatlantik, larg fraksionit të drejtuar nga ish-kryeministri Sali Berisha.
Sipas formulës së re zgjedhore, çdo koalicion ka paraqitur nga 186 kandidatë për deputetë: 140 nga lista e hapur dhe 46 nga lista e mbyllur, duke reflektuar ndryshimet e fundit ligjore që synojnë rritjen e transparencës dhe përfaqësimit në Kuvend.
Fushata e këtij viti pritet të jetë ndër më të intensivet e dekadës së fundit, ku krahas temave tradicionale si ekonomia, punësimi dhe drejtësia, integrimi evropian dhe reforma zgjedhore mbeten në epiqendër të debateve politike./Katror.info
Përgatiti:
