Mbrëmë në Sarajevo Film Festival u shënua një moment i rëndësishëm për kinematografinë kosovare, pasi filmi “Vidra” (Otter) hapi Competition Programme të festivalit, ku Kosova është bashkëprodhënëse përmes Qendrës Kinematografike të Kosovës (QKK), shkruan Katror.info.
Filmi, i subvencionuar nga QKK si koproduksion minor, vjen me pjesëmarrjen e aktorit dhe producentit Fatmir Spahiu, ndërsa në role të tjera luajnë Aurita Agushi dhe Edona Reshitaj. Po ashtu, në ekipin teknik përfshihen Pëllumb Ballata dhe Nok Selmani në fushën e regjistrimit të zërit.
“Vidra” është drama më e re e regjisorit boshnjak Srdan Vuletić, i cili pas një pauze 17-vjeçare është rikthyer fuqishëm në kinematografi. Filmi është i bazuar në tregimin e shkurtër të Stefan Bošković, i cili ka shkruar edhe skenarin, dhe trajton historinë e një adoleshenteje që përballet me dhimbjen e humbjes dhe me realitete të rënda shoqërore.
Mundesh me e lexu edhe…
Për Qendrën Kinematografike të Kosovës, ky bashkëprodhim shënon një tjetër hap drejt përfshirjes së kinemasë kosovare në produksione rajonale dhe ndërkombëtare, duke forcuar pozicionin e saj në festivale prestigjioze si Sarajevo Film Festival.
Drejtori Vuletić, i njohur për filmat e suksesshëm “Summer in the Golden Valley” dhe “It’s Hard to Be Nice”, theksoi në një intervistë për Variety se kjo periudhë e re për të është rikthim i shumëpritur në kinematografi, pavarësisht sfidave që sipas tij i ka kaluar industria e filmit në Bosnje./Katror.info
