Me një performancë të bukur, Endrit Krasniqi me këngën ‘’Flas me gjethen’’ triumfoi në edicionin e dytë të Festivalit të Këngës në RTK, duke rrëmbyer trofeun ‘’Diamanti blu’’.
Me një stil të veçantë, ai arriti të kapte ndjenjat e publikut, duke krijuar një atmosferë energjike në sallë.
Ndërsa në prapaskenë ndau këtë përvojë me zërin e tij ende të ngarkuar nga emocioni.
Mundesh me e lexu edhe…
“Nuk e prita asnjë pikë, kam qajtë, jam tu qajtë hala, jam t’u mundu me i mshef emocionet ama honestly… faleminderit. Mas pari unë për vete kisha thënë që s’kam m’u ndalë, mendoj që kjo varet më shumë prej meje, sepse nëse unë nuk i jap publikut diçka të re, nonstop, e nuk i marr me vete, atëherë s’ka kurrgjë, po shpresoj në sendet e mëdha, shpresoj çka do që të vjen, le të vjen, mirë se ardhët.’’
Juria ndau çmimin e dytë për Greta Azizin, me këngën “Verës”, derisa çmimi i tretë i shkoi Dea Stricës me këngën “N’Shqipni”.
E lumtur për pjesëmarrjen dhe çmimin Dea Strica tha se nata finale tejkaloi pritshmëritë e saj, derisa nuk kurseu fjalët e mira për festivalin.
’’Publiku sonte ishte magjik, është shumë i ngrohtë, është shumë i dashur. Na bëri shumë më të lehtë edhe performancën. E prisja që nata e tretë ishte magjike, por realisht i tejkaloi të gjitha limitet. Jam mirënjohëse për këtë, për këtë eksperiencë pa dyshim edhe sigurt që do e mbaj në zemrën time për shumë shumë gjatë pa dyshim mendoj që jo vetëm edicioni i parë, po edhe ky edicioni i dytë ka dëshmuar që ky festival, këta artistë dhe kjo punë meriton të kalojë kufijtë’’
Çmimi i Pallatit të Rinisë dhe i Kryeqytetit shkoi për Besmir Shishko me këngën “Unë ajo”, të cilat i mori nga nënkryetari i Prishtinës, Alban Zogaj dhe udhëheqësja e Pallatit të Rinisë, Mrika Gashi, duke u bërë konkurrenti i vetëm me dy çmime.
‘’Po në përgjithësi ka qenë një një përvojë shumë e mirë. Jemi njoftu me njerëz shumë të mirë. Kemi pasë njëfarë energjie shumë të mirë krejt këtu. Organizatorë kanë na kanë ndihmu shumë e kanë organizu ne një fare vendi shumë të veçantë për të gjithë neve edhe ka qenë kënaqësi me qenë pjesë e këtij spektakli’’,u shpreh Shishko.
Çmimin e orkestrës e ndau drejtori artistik i Festivalit, Florent Boshnjaku për Arnitë Kastrati me këngën “Blla blla.
Ndërsa konkurrenti Blendi Kaso i cili mori pjesë me këngën “Një të vetme ka në jetë” u shpreh se Festivali i Këngës në Prishtinë do të jetë kurora e muzikës kosovare.
‘’Është një skenë gjigante që për mua është fat që të jem në këtë skenë. Unë u ndjeva shumë mirë. Është një publik fantastik dhe i përgëzoj të gjithë për këtë punë kolosale që kanë bërë me këtë festival madhështor. Për mua është një ogur shumë i mirë dhe festivali kombëtar i një shteti, për mua është kurora e muzikës të atij shteti, edhe festivali në Kosovë do jetë kurora e muzikës kosovare’’, tha ai.
Një zë i ftuar që vlerësoi rëndësinë e festivalit mes të ftuarve tjerë specialë të mbrëmjes ishte këngëtari i mirënjohur Alban Skenderaj, i cili solli një performancë të paharrueshme për publikun me këngën ‘’Për ty’’, teksa edhe publiku në sallë iu bashkua duke kënduar bashkë me të.
Ai foli në prapaskenë për rëndësinë e Festivalit të Këngës për muzikën kosovare dhe mundësinë për zhvillimin e talentëve të rinj.
“Shumë entuziast edhe pozitiv për gjithçka që po ndodh, sepse kishte kohë që Kosova meritonte një festival të tillë, ku mund të kryhej një traditë muzikës së së lehtë edhe të mirëfilltë dhe një dritare shumë e mirë për të gjithë artistët, jo vetëm të konsoliduar, po edhe artistë e rinj që kanë gjithmonë edhe më shumë nevojë për për pak mbështetje dhe për një skenë dinjitoze ku të promovohen. Nuk do hyja në detaje, sepse është gjithsesi që bëhet një një analizë pak më e thellë, por mund të thoja këtë që, spektaklet në Kosovë janë gjithmonë edhe më shumë në rritje dhe kjo është një gjë shumë pozitive, sepse Kosova prodhon art te jashtëzakonshëm, talente të jashtëzakonshme dhe duke arritur të prodhojë dhe spektakle të mira, dinjitoze dhe profesionale, kompletohet në tërësinë e saj si një shtet tashmë i ri, por prapë se prapë drejt një konsolidimi që vetëm vetëm shtohet’’, u shpreh Skenderaj.
Skena e edicionit të dytë të Festivalit të Këngës ishte një spektakël më vete, e krijuar me përkushtim nga dy skenografet e talentuara, Rudina Xhaferi dhe Shqipe Kamberi. Çdo detaj i skenës ishte punuar me një përkushtim dhe kujdes të madh.
”Përgjatë gjithë procesit si vjet edhe fizikisht jemi dërmu jashtëzakonisht shumë. Po që kur e pamë produktin final, kur u bashkëngjitën edhe ndriçimi, videoholli, realizimi, të gjitha këto elemente, si copëzat, puzzle-t, tërësia që me na u bë mu ndi krenarë secili prej anëtarëve të ekipit që jemi të involvuar në këtë projekt. Elementet të cilat i kemi përdorë, skena sivjet është shumë më e naltë, është për dy metër më e naltë edhe materiale të cilat i kemi përdorë. Qëllimi jonë ka qenë që me kriju qatë ndjesinë që mos me u ditë cili element është në plan të parë, cili në të dytin dhe me e kriju gjithë kohën atë ndjeshmëri dhe atë ndjesi të përrallës së diamantit që e kemi pas në fillim si një pikënisje…’’, u shpreh Rudina Xhaferi.
Ngjyrat e ndriçimit, vendosja e elementeve vizuale dhe struktura unike e skenës u kombinuan për të sjellë një eksperiencë tërheqëse për publikun dhe artistët.
‘’Këtë edicion jemi mundu me e tejkalu vitin e kalum, se aty ka qenë përgjegjësia jonë. Vjet bëri shumë bujë dhe sivjet përgjegjësinë e kemi pasë shumë më të madhe në supe për me tregu diçka akoma më ndryshe dhe më jo të njëjtë. Çka e ka veçu është lloji i materialeve që i kemi përdorë, të cilat i kemi përdorë për herë të parë, është hapësira 360 shkallë, që jemi mundu me përtheku që edhe publiku me qenë pjesë e skenografisë tonë, do të thotë kemi pasë dëshirë që me frymu në një stil tjetër prej vitit të kalum, po me një anë me u dallu stili jonë i përbashkët që na veçon me Rudinën”, tha Shqipe Kamberi.
Festivali i Këngës ka nisur nga Radio Televizioni i Kosovës me synimin që kënga fituese të konkurrojë në Eurovizion, kurdo që Kosova të pranohet. RTK i ka dërguar kërkesë zyrtare Unionit Evropian të Transmetuesve (EBU) duke kërkuar që Kosova të ftohet në edicionin e ardhshëm të “Eurovision 2025”. /Katror.info
Përgatiti:
