Pas dekadash teorish, fizikanët kanë konfirmuar për herë të parë ekzistencën e reflektimit të kohës, një fenomen ku sinjalet kthehen pas në kohë, jo në hapësirë – si të shihesh në pasqyrë dhe të shohësh shpinën tënde.
Ekipi i udhëhequr nga Hady Moussa në Qendrën e Kërkimeve Shkencore në CUNY, New York, realizoi eksperimentin duke manipuluar një metamaterial në mënyrë që të kthente drejtimin e një vale elektromagnetike në kohë, përcjell Katror.info.
Ky fenomen quhet “reflektim kohor” (time reflection) dhe ndryshon nga reflektimi i zakonshëm sepse valët nuk kthehen pas në hapësirë, por në kohë, duke ndryshuar frekuencën e tyre dhe krijuar efekte të reja.
Mundesh me e lexu edhe…
Eksperimenti përdori metamateriale të dizajnuara për të manipuluar valët në mënyrë të paprecedentë, me komponente elektronike që krijuan një “kërcim” të menjëhershëm në impedancë – një ndryshim që bëri të mundur kthimin e valës në kohë.
“Ne kemi arritur të provojmë se reflektimi kohor nuk është më vetëm teori – ai ndodh në kushte të kontrolluara,” thanë studiuesit.
Çka do të thotë kjo?
Ky zbulim hap rrugë të reja për kontrollin e sinjaleve në teknologjinë e komunikimit, sensorëve dhe kompjuterëve. Mund të lejojë transmetim të dhënash në mënyra të reja, ose krijimin e pajisjeve që manipulojnë kohën në nivel valësh – pa fantashkencë, por me matematikë reale.
Në të ardhmen, pasqyrat e kohës mund të kombinohen për të krijuar “kavitete kohore”, duke lejuar që sinjalet të ndalojnë dhe të reflektohen disa herë në mënyra të papara më parë.
Studiuesit tani po planifikojnë eksperimente të reja për frekuenca më të larta, valë akustike apo edhe spin-valë, me synimin për të ndërtuar teknologji të reja memorieje dhe logjike.
Ky është një hap gjigant në fizikën moderne, që mund të ndihmojë edhe në rishikimin e teorive të vjetra për rrjedhën e energjisë dhe kohës.
Lexo studimin e plot të publikuar në Nature Physics. /Katror.info
