Fondi i Kosovës për Efiçiencë të Energjisë (FKEE) ka njoftuar se do të vazhdojë me trajtimin e aplikimeve të mbetura në listën e pritjes, pas përfundimit të fazës së aplikimeve për subvencione në kuadër të Thirrjes Publike 2024, shkruan Katror.info
Sipas komunikatës zyrtare, bazuar në buxhetin aktual të disponueshëm, FKEE do të trajtojë rreth 150 aplikuesit e parë nga gjithsej 430 aplikime që ndodhen në listën e pritjes. Përzgjedhja do të bëhet duke respektuar parimin: “i pari aplikues, shërbehet i pari”, derisa të shfrytëzohen të gjitha mjetet e mbetura të dedikuara për këtë qëllim.
Procesi do të zhvillohet në përputhje me rregullat e transparencës dhe llogaridhënies. Aplikuesit që do të përzgjidhen do të njoftohen përmes e-mailit të përdorur gjatë aplikimit në platformën e-Kosova, ku do të pranojnë letrat e para-aprovimeve dhe udhëzimet për hapat e mëtejshëm.
Mundesh me e lexu edhe…
FKEE ka theksuar përkushtimin e saj për të siguruar fonde shtesë në të ardhmen, me qëllim të zgjerimit të mbështetjes për qytetarët që synojnë të zbatojnë masa për kursimin dhe rritjen e efiçiencës së energjisë në shtëpitë e tyre.
Ky projekt po zbatohet me mbështetjen financiare të Bashkimit Evropian në Kosovë, në bashkëpunim me Qeverinë e Republikës së Kosovës./Katror.info
