Mexosopranoja Flaka Goranci do të sjellë koncertin e saj “La Femme” (Gruaja) në Spanjë, ku do të debutojë si këngëtare lirike.
Pas koncerteve në Vjenë, Luksemburg dhe Tiranë, programi i saj do të udhëtojë në qytetet Alicante dhe Valencia. Koncertet do të mbahen më 9 mars, në Alicante në orën 12:00 dhe në Valencia në orën 20:00. Në këto performanca, Goranci do të interpretojë vepra të kompozitoreve femra, duke e pasuruar repertorin e saj me muzikë klasike.
“Prezantimi i ‘La Femme’ në Spanjë është një moment i veçantë për mua, jo vetëm sepse është debutimi im në këtë vend me një traditë të pasur të muzikës klasike, por edhe sepse Spanja ka një histori të jashtëzakonshme të artistëve dhe kompozitorëve që kanë ndikuar në këtë zhanër. Përveç kësaj, publiku spanjoll ka një ndjenjë të veçantë për interpretimet e fuqishme dhe ekspresive, gjë që më motivon të jap maksimumin në këtë debutim”, është shprehur Goranci nëpërmjet një përgjigjeje me shkrim për KOHËN.
Mundesh me e lexu edhe…
Albumi që do të jehojë në Spanjë përfshin vepra të kompozitoreve nga Lindja e Mesme, Evropa, Ballkani dhe Afrika e Jugut midis tjerash. Pjesë e tij janë 21 vepra që nëpërmjet muzikës sjellin tregime frymëzuese të 21 kompozitoreve.
Pos këngëve, përfshihen edhe vepra solo në piano, violinë, violonçel e ansamble më të vogla.
“’La Femme’’ është një projekt që ndërton ura midis kulturave të ndryshme, thyen kufijtë politikë dhe bashkon veprat reflektuese që flasin për paqen, përkushtimin, pasionin dhe dashurinë. Një grup prej 21 grash kompozitore nga Lindja e Mesme, Evropa Perëndimore dhe Lindore, Ballkani, Afrika e Jugut, Kanadaja, SHBA-ja dhe Amerika Latine janë bashkuar në këtë projekt për të treguar vlera të barabarta përmes prejardhjeve të tyre të ndryshme”, shkruhet në përshkrimin e albumit.
Koncerti mbahet në selinë e “Casa Mediterráneo” në Alicante, ndërsa në Valencia në ndërtesën historike “Lonja de la Seda”, monument i trashëgimisë botërore nga UNESCO, i cili vlerësohet si kryevepër e stilit gotik valencian.
E projekt i saj, “La Femme”, i lansuar tre vjet më parë, krahas vlerësimeve të larta nga kritika ndërkombëtare, u nominua dhe në tri kategori nga “Opus Klassik” në Berlin, çmim i dhënë për arritje të larta në fushën e muzikës klasike. U nominua në kategoritë “Këngëtarja më e mirë e vitit”, “Klasik pa kufij” si dhe “Videoklipi më i mirë”.
“’La Femme’ sjell një kombinim unik të veprave që ndriçojnë rolin e gruas në muzikë, duke përfshirë arie operistike, këngë tradicionale dhe pjesë nga repertori klasik e bashkëkohor. Dhe kryesorja e gjithë kësaj është programi i tërë me vepra nga gra kompozitore nga e gjithë bota”, është shprehur mexosopranoja Flaka Goranci.
Dy javë më parë Goranci qe soliste në koncertin solemn të Filharmonisë së Kosovës, të organizuar për nder të përvjetorit të 17-të të pavarësisë së Kosovës. Në “Sallën e kuqe” ajo i dha zë veprës “I miri i motrës” të Korab Shaqirit, që ka qenë premierë, midis veprave të tjera të kompozitorëve vendorë. Në veprën për soliste, kor dhe orkestër, mexosopranoja Flaka Goranci i ka dhënë emocion të veçantë rrëfimit të saj. Me tekst të Ilir Shaqirit, vepra trajton tragjedinë në një dasmë shqiptare./Katror.info
Përgatiti:
