Një lajm i rrallë dhe i gëzueshëm për natyrën shqiptare: për herë të parë, flamingot kanë folezuar në territorin shqiptar. Ky moment historik u regjistrua në lagunën e Nartës, ku flamingot prej vitesh kishin shfaqur shenja të qarta se po kërkonin të krijonin koloni të qëndrueshme, shkruan Katror.info
Gjatë monitorimeve të fundit, ekspertët e biodiversitetit kanë evidentuar 281 fole me vezë, të cilat pritet të çelin shumë shpejt. Kjo ngjarje e jashtëzakonshme përfaqëson jo vetëm një shtim të biodiversitetit të Shqipërisë, por edhe një sinjal pozitiv për rolin që territori shqiptar mund të luajë në qëndrueshmërinë e kësaj specieje në nivel rajonal dhe europian.
“Folezimi i flamingove në Shqipëri konfirmon rëndësinë ekologjike të lagunës së Nartës dhe nevojën për mbrojtje të vazhdueshme të këtij habitati,” – shprehen ekspertët mjedisorë. Sipas tyre, nëse sigurohet qetësia dhe ruajtja e kushteve natyrore, flamingot mund të bëhen një pjesë e përhershme e peizazhit shqiptar.
Mundesh me e lexu edhe…
Por ky sukses i natyrës vjen në një moment kritik. Në të njëjtin vit që flamingot folezuan për herë të parë, në habitatin e tyre u zhvillua fluturimi testues i Aeroportit Ndërkombëtar të Vlorës – një projekt i diskutueshëm nga qeveria shqiptare. Sipas organizatave mjedisore, edhe ky një fluturim i vetëm i një avioni të vogël demonstroi rrezikun e madh që paraqet aeroporti për popullatën e shpendëve në deltën e Vjosës.
Flamingoja tashmë i është shtuar listës së shpendëve folezues në Shqipëri, por gëzimi i këtij lajmi rrezikon të zbehet shpejt nëse ndërhyrjet e njeriut – si zhvillimi i paqëndrueshëm dhe ndërtime të mëdha pranë zonave të mbrojtura – nuk ndalohen.
Ekspertët dhe organizatat mjedisore u bëjnë thirrje autoriteteve që të garantojnë mbrojtje efektive për lagunën e Nartës dhe të rishqyrtojnë çdo projekt që mund të kërcënojë këtë mrekulli natyrore. Nëse Shqipëria dëshiron të mbajë këtë arritje dhe të forcojë rolin e saj në ruajtjen e biodiversitetit europian, duhet të zgjedhë të jetë mikpritëse, jo vetëm për turistët, por edhe për flamingot që e kanë zgjedhur këtë tokë për të jetuar./Katror.info
