Lirshëm mund të cilësohet aventura teknologjike më e fuqishme në vend. Organizimi ka qenë i hatashëm, ndërkaq ka arritur që Kosovës t’ia sjellë vëmendjen botërore.
Kosova është vendi i vetëm në Ballkan që ka pasur shansin e zbarkimit të FOSS4G në të. Për shtatë ditë sa ka zgjatur kjo konferencë ndërkombëtare në Prizren, ka bashkuar gati 1,000 persona, të cilët kanë ardhur nga mbi 50 shtete të botës. Sigurisht se të mirat do të ndjehen vite e vite pas mbarimit të kësaj konference shtatë ditore dhe këtij rrugëtimi të teknologjisë gjeohapësinore.
“FOSS 4G” e ndryshoi ‘lojën’ për sa i përket organizimeve. Nuk i mungoi asgjë dhe ishte e barabartë me çdo konferencë tjetër që ndodh nëpër Evropë. Këtë e mundësoi fakti që ka traditë 15 vjeçare të organizimit nëpër dhjetëra kontinente.
Mundesh me e lexu edhe…
Jo veç në aspektin teknologjik, por kjo konferencë shërbeu edhe si urë lidhëse për kontakte të reja. Madje shumë prej pjesëmarrësve iu ndryshua bindja për Kosovën me rastin e ardhjes në Prizren, thekson Besfort Guri, drejtues i konferencës.
Përveç kësaj pjesës teknologjike, një pjesë shumë e rëndësishme është edhe socializimi i njerëzve sepse vijnë njerëzit prej jashtë dhe e shohin Kosovën, shohin sa ka kapacitet këtu.
“Mendoj që pjesa e B2B, bizneset të cilat janë prezente aktualisht kanë qenë edhe në konferenca tjera të FOSS4G. Kryesisht njihen mes veti, mirëpo e ka sjellë atë vlerën kryesore, ma të madhe që me u mbledh, me u njoftu me bizneset në Kosovë edhe me personat që bëjnë punë të ndryshme. Besoj ka qenë mjaft e suksesshme. Kam parë që janë realizuar dy tre kontakte që kanë me u vazhdu bisedimet, shprehet Guri, i cili tregon edhe për përshtypjen e pjesëmarråsve për Kosovën.
“Kanë prit me qenë shumë ma ndryshe Kosova duke i parë lajmet edhe gjanat tjera, mirëpo kur kanë ardhë këtu tash e tregojnë storjen që është krejt ndryshe. Programi ka qenë i mbushur me ngjarje të ndryshme. Ndërkaq pritja e pjesëmarrësve ka qenë aq e mirë saqë organizatorët shpesh edhe kanë përsëritur aktivitete.”
Gresa Neziri nga SpaceSyntaKs, thotë se si konferencë ka shumë momente interesante njëri mbi tjetrën që kanë ndodhur në Kosovë.
“Key notes apo prezantimet kryesore që janë një në mëngjes dhe një në mbramje natyrisht kanë qenë normalisht ndër prezantimet më të ndjekura, çdo ditë salla ka qenë plot. Çka neve na ka lënë përshtypje, edhe pse s’jemi përgatit por prapë e kemi marrë si shumë pozitive, është që në shumë raste sallat kanë qenë të mbushura edhe ka pasë shumë raste kur na është dashtë t’iu themi njerëzve se është mbyllur salla sepse është mbushur kapaciteti dhe është dashur ta zgjedhin një prezantim tjetër.”
Katror Media ka qenë partneri i vetëm medial lokal i kësaj ngjarje të madhe në nivel global. Ekipi i lajmeve të mira ka qenë i angazhuar me 215 ore xhirime, 17 edicione të transmetuara drejtpërdrejt me pajisjet më profesionale të kualitetit broadcast për 3 ditë me radhe në 12 salla, duke përfshirë edhe ambiente të jashtme, shprehet Muhamet Jashanica, drejtor ekzekutiv i Katror Media.
“Po përshtatet edhe FOSS4G me Katrorin në sensin e pozitivitetit. Është shumë e vërtetë, për shkak se ne si medie e lajmeve të mira, platforma e vetme në gjuhën shqipe, i kemi dhënë vetes synim me prezantu të mirën. Ajo çka ndodh në vendin tonë, rajon dhe më gjerë. Natyrisht që një ngjarje e tillë siç është FOSS4G që po mbahet për herë të parë në Kosovë, por edhe në Ballkan, fati jonë i mirë është që është në Prizren, në Kosovë.”
“Ka qenë një prej ngjarjeve që ne kemi pasur interes shumë të madh me përcjell dhe natyrisht jemi ndje tepër mirë që kemi arritur marrëveshje bashkëpunimi si partneri medial i konferencës. Është e pashmangshme mbulimi i një ngjarje të tillë prezent janë më shumë se 1,000 veta nga 5 kontinente, nga gjithandej vendeve të botës, rëndësia që e ka kjo konferencë duke qenë e karakterit global dhe natyrisht për komunitetin e open source, open data, është kënaqësi e madhe, e jashtëzakonshme me promovu një ngjarje të tillë që ndodh në vendin tonë. Nuk ka shpesh ngjarje të tilla që ndodhin te ne prandaj jemi shumë të lumtur që kemi mbërri sadopak me kontribu dhe me promovu një të mirë që po ndodh në vendin tonë.”
S’po na mbetet kurgjë tjetër përveçse me u krenu me këtë të arritur të Katrorit apo jo?
“Realisht është e arritur e FLOSSK-ut, bashkëpunëtorit tonë që kanë bërë një punë të mrekullueshme. Natyrisht dua të falenderoj gjithë ekipin e Katror Media,duke përfshirë edhe juve që kanë qenë krejt këto ditë bashkë me mua, bashkë me ekipin, bashkë me Katrorin edhe i kemi dhënë një shije të madhe të profesionalizmit, krejt kësaj konference sa i përket aspektit të videove dhe transmetimeve të drejtpërdrejta,” thotë Jashanica.
Drejtori i OsGeo, Angelos Tzotsos si organizatori i kësaj ngjarje tha se Kosovës s’i ka munguar asgjë nga shtetet nikoqire paraprake.
“Ka qenë një FOSS4G shumë i suksesshëm. Jemi të lumtur që çdo vit tentojmë të lëvizim nëpër botë dhe të bëjmë konferencat duke i pasur komunitetin lokal prezent, t’i bashkojmë njerëzit rreth open source. E konsiderojmë si qëllim tonin të kemi më shumë kontribues, zhvillues të open source në gjithë botën. Në Kosovë kemi gjetur njerëz shumë të shoqërueshëm, jemi të lumtur me hapësirën, me udhëtimin për të ardhur në një vend të mrekullueshëm. Organizatorët kanë bërë punë të shkëlqyeshme dhe njerëzit po e shijojnë. Po bëjnë qef,” thotë ai.
Kjo konferencë ka ndër vite ndjekës të rregullt. Njëri nga ta është edhe organizatori i FOSS4G së vite më parë në Bukuresht, Vasile Stefan Craciunescu, të cilit s’i ka ikur asnjë edicion.
“E di sa e vështirë ka qenë për ju ta organizoni konferencën këtu, të sjellni kaq shumë njerëz dhe të arrini besimin e tyre. Ka qenë vështirë edhe për mua. Më pëlqen që ia dolët. Nuk është e lehtë. Njerëzit që s’janë të përfshirë në organizim nuk e dijnë sa vështirë është ta realizojnë këtë,” thotë ai.
Ndër pjesët më të rëndësishme të konferencës kanë qenë fjalimet akademike. Në mesin e pesë folësve ndërkombëtarë, ka qenë edhe profesori universitar Lorik Haxhiu.
“I jashtëzakonshëm me qenë në mesin e folësve të Keynotes, duke marrë parasysh që ka shumë folës, workshope dhe ngjarje tjera. Por folësit e Keynotes dhe si përfaqësuesi vendor i gjeoinformatikës, edhe prezantimi im ka me qenë i lidhur drejtpërdrejt me tematikën e kësaj ngjarjeje, që ka të bëjë me shfrytëzimin e informacionit gjeografik. Unë do të flas më specifikisht për punën që e kemi kryer përmes projektit të USAID-it, që ka të bërë me përdorimin e teknologjive bashkëkohore të gis-it dhe të imazherisë nga droni për vlerësimin e potencialit solar në kulmet e bizneseve dhe amvisërive në Kosovë,” thotë Haxhiu.
Ndërkaq vlerësim të konferencës ka pasur edhe nga sponsori kryesor i saj, R:Earth.
“Kam dëgjuar për Kosovën por s’kam pasur ide të qartë, por pasi kam ardhur jam bindur se çdokush që është në Kosovë është shumë i shoqërueshëm, janë të mirë dhe unë u çudita sa njerëz të mirë ka këtu. Gjithashtu kam hulumtuar për disa çështje historike dhe për Kosovën, e tash jam bërë fans i madh i Kosovës. Gjatë kësaj konference, kam shkuar poshtë në qytet dhe kam parë një qytet të bukur që ka mish të mirë dhe sigurisht se do të vij sërish,” Hidemichi Baba.
Në nivel global, FOSS4G udhëton në Brazil vitin e ardhshëm. Ndërkaq në nivel kontinentesh sivjet do të mbahet në Azi, Oqeani e Amerikë të Veriut. Ndërkaq në Kosovë nuk do të përsëritet më, për të mbetur e shkruar në histori./Katror.info
Përgatiti:
