Në një përpjekje për të adresuar shqetësimet e qytetarëve, Ministria e Ekonomisë, KOSTT dhe KEDS mbajtën një takim të përbashkët mbrëmjen e kaluar për të shqyrtuar situatën e furnizimit me energji elektrike.
Këtë e ka bërë të Ministria e Ekonomisë përmes një njoftimi në rrjete sociale.
Takimi erdhi pas ankesave të shumta nga qytetarët e disa komunave të Kosovës, të cilët kanë raportuar ndërprerje të shpeshta të energjisë gjatë ditëve të fundit.
Mundesh me e lexu edhe...
“KOSTT dhe KEDS raportojnë se, me uljen e temperaturave, konsumi i energjisë elektrike ka arritur nivele shumë të larta, mbi 1400 MW në kohë të caktuara. Si rezultat, sistemi ynë elektro-energjetik është ngarkuar tej mase, duke shkaktuar vështirësi teknike në furnizim dhe duke e rrezikuar rrjetin; kësisoj, ka qenë e domosdoshme që operatorët të bëjnë shkyçje në disa vendbanime ku ngarkesa ka qenë e papërballueshme për rrjetin“ thuhet në njoftim.
Në njoftim theksohet se vështirësitë më të mëdha në furnizimin me energji elektrike janë hasur në komunat e Ferizajt, Lipjanit, Gjakovës, Malishevës, Gjilanit, Shtimes, Istogut dhe Prizrenit, ku ndërprerjet e energjisë kanë prekur disa nga vendbanimet që furnizohen nga linjat e afektuara.
“Ekipet e KOSTT-it dhe KEDS-it janë duke punuar pa ndërprerje në terren për të minimizuar ndikimin në furnizimin me energji dhe për të siguruar shërbim të pandërprerë për qytetarët, “ thuhet tutje në njoftim.
Ndërkaq, sipas njoftimit, në Fushë-Kosovë, përmirësimi ka ardhur pas energjizimit të nënstacionit të ri 110kV gjatë javës së kaluar, duke lehtësuar ndjeshëm ngarkesën dhe duke adresuar problemin e furnizimit për banorët e kësaj komune.
“Gjatë javës në vijim pritet që të përfundojë ndërtimi i nënstacionit të tretë në Ferizaj nga KOSTT, gjë që do të zgjidhë problemet e furnizimit në këtë komunë, dhe do të lehtësojë ngarkesën edhe në vendbanimet të cilat furnizohen nga linjat e ndërlidhura me këtë nënstacion. Në tremujorin e parë të vitit 2025, investime të tjera planifikohen për komunat e Malishevës dhe Dragashit me qëllim të zgjidhjeve afatgjata për furnizimin e qëndrueshëm me energji“ theksohet në njoftim
Në njoftim nënvizohet se një ndër faktorët e rritjes së konsiderueshme të konsumit të energjisë elektrike, është shkak i festave të fundvitit.
Në fund, Ministria e Ekonomisë apelon tek qyetarët që të jenë sa më të kujdesshëm në konsumin e energjisë, veçanërisht gjatë orëve të paradites nga ora 09:00-12:00 dhe pasdites nga ora 18:00-00:00.
“Kursimi i energjisë në këto periudha është thelbësore për të shmangur mbingarkesat dhe për të siguruar funksionalitetin e sistemit për të gjithë“ potencohet në njoftim.
Gjithashtu, qytetarët inkurajohen që, kur është e mundur, të përdorin burime alternative për ngrohje si druri ose peleti, dhe të zhvendosin konsumimin e energjisë elektrike pas mesnatës. /Katror.info
Përgatiti:
