Një sondazh i fundit i Reuters Institute for the Study of Journalism tregoi se shmangia e lajmeve po arrin përmasa rekord në mbarë botën. Në gati 50 vende, 40% e të anketuarve thanë se shpesh i shmangen lajmeve – një rritje e ndjeshme krahasuar me vitet e kaluara. Një nga arsyet kryesore? Lajmet po ndikojnë negativisht në gjendjen shpirtërore të njerëzve.
Ky është një alarm serioz për gazetarinë. Nëse publiku po e mbyll veten ndaj lajmeve sepse ato sjellin vetëm lodhje, frikë apo irritim, atëherë është koha që ne si media të reflektojmë thellë mbi rolin tonë. Nuk mjafton vetëm të raportojmë çfarë ndodh; mënyra si raportojmë është po aq e rëndësishme.
Prandaj ne, si Katror Media, që nga dita e parë kemi zgjedhur një qasje tjetër: gazetarinë konstruktive. Për ne, kjo nënkupton:
Mundesh me e lexu edhe...
- Të sjellim lajme të mira, por edhe kritike, objektive e të balancuara;
- Të merremi me çështje të rëndësishme për shoqërinë, jo me skandalet që nxisin urrejtje;
- Të ndërtojmë ura, jo të thellojmë ndarje;
- Të punojmë për të ardhmen, pa u mbërthyer tek e kaluara;
- Të shpjegojmë kontekstin e ngjarjeve dhe të bazojmë çdo gjë në fakte;
Por gazetaria konstruktive për ne nuk është vetëm mënyrë e raportimit. Ajo është edhe mbështetje e aktivizmit qytetar. Që nga dita e parë, ne kemi vendosur fokusin tek individët dhe organizatat që punojnë çdo ditë për të adresuar problemet konkrete të qytetarëve. Shpesh këta njerëz nuk presin që institucionet të ofrojnë zgjidhje – ata vetë mobilizohen, angazhohen dhe bëjnë ndryshimin.
Ne kemi besuar gjithmonë se duke i dhënë zë këtij aktivizmi qytetar, jo vetëm që informojmë publikun, por e fuqizojmë atë. Sepse gazetaria konstruktive nuk ndalet tek problemet – ajo u jep zë edhe përpjekjeve dhe zgjidhjeve që burojnë nga vetë shoqëria.
Ne e dimë që sot shoqëria jonë është skajshmërisht e polarizuar – si në politikë, ashtu edhe në media. Diskursi është negativ dhe shpesh dekonstruktiv: ose je “me ne”, ose “me ata”. Ne kemi vendosur të jemi antidoti i kësaj gjendjeje.
Më 20 shtator, Katror Media mbush 3 vjet. Në këto tri vite kemi treguar se është e mundur të bësh gazetari të mirë pa hedhur benzinë mbi zjarrin e ndasive. Duke i dhënë hapësirë aktivizmit qytetar dhe duke ndërtuar ura komunikimi, ne kemi treguar se gazetaria mund të informojë me përgjegjësi, të kritikojë me qëllim përmirësimi dhe të hapë hapësira për kuptim e dialog konstruktiv.
Në kohën kur gjithnjë e më shumë njerëz shmangin lajmet, ne në Katror Media besojmë se gazetaria konstruktive është rruga e vetme për të rikthyer besimin, për të fuqizuar individin dhe për t’i dhënë shoqërisë tonë një frymë më të shëndetshme debati.
Ne nuk e kemi ndërmend të ndalemi.
Për këtë trevjetor dhe shumë e shumë të tjerë, gëzuar Katror! 🥂
#katrormedia #veclajmetemira #skamunal
Përgatiti:
