Ministrja në detyrë për Punë të Jashtme dhe Diasporë, Donika Gërvalla, ka vlerësuar lart rolin e Belgjikës si një nga mbështetëset më të qëndrueshme të Kosovës në skenën ndërkombëtare dhe në rrugëtimin e saj drejt integrimeve evropiane dhe euroatlantike, shkruan Katror.info.
Pas takimit të zhvilluar me Ministrin e Jashtëm të Belgjikës, Maxime Prévot, Gërvalla theksoi rëndësinë e kësaj vizite për thellimin e partneritetit të ndërsjellë dhe përforcimin e marrëdhënieve mes dy vendeve.
“Takimi me Ministrin Prévot ofroi mundësinë ideale për të theksuar miqësinë e sinqertë dhe partneritetin e qëndrueshëm ndërmjet dy vendeve tona. E falënderova për mbështetjen e vazhdueshme të Belgjikës në procesin e shtetndërtimit dhe për rolin e saj të rëndësishëm në forcimin e pozitës ndërkombëtare të Republikës sonë,” tha Gërvalla.
Ajo nënvizoi diskutimet për bashkëpunim të thelluar në fusha kyçe si drejtësia, arsimi, kultura dhe ekonomia, duke shtuar se Belgjika ka shprehur përkrahje të qartë për avancimin e Kosovës në organizata ndërkombëtare, përfshirë edhe procesin e anëtarësimit në Këshillin e Evropës.
“Rëndësia e trajtimit të barabartë të Kosovës në të gjitha forumet evropiane mbetet jetike. Mbështetja për vendin tonë duhet të reflektohet përmes veprimeve konkrete që nxisin integrimin në familjen evropiane dhe përmbushjen e aspiratave tona euroatlantike,” theksoi ministrja.
Ajo gjithashtu veçoi rolin e diasporës kosovare në Belgjikë si një urë lidhëse me ndikim të madh në forcimin e marrëdhënieve dypalëshe, duke theksuar potencialin për projekte të përbashkëta kulturore, arsimore dhe zhvillimore.
“Republika e Kosovës mbetet e përkushtuar ndaj vlerave të përbashkëta me partnerët tanë evropianë dhe euroatlantikë. Belgjika ka qenë dhe do të mbetet një aleate e çmuar dhe një zë i fuqishëm në mbështetje të drejtësisë, stabilitetit dhe demokracisë në Ballkanin Perëndimor,” përfundoi Gërvalla./Katror.info
Përgatiti:
