Nuk është vetëm ndjenja juaj – temperaturat, dielli dhe klori ndikojnë në ciklin e flokëve, por me kujdesin e duhur, gjithçka kthehet në normalitet
Nëse këto ditë ju duket se flokët po ju bien më shumë se zakonisht, mos u shqetësoni, në shumicën e rasteve bëhet fjalë për një reagim krejtësisht natyral të trupit ndaj kushteve të jashtme.
Kur temperaturat rriten, edhe flokët tanë vuajnë. Rrezet e diellit dhe ekspozimi ndaj UV-ve i thanin dhe i dëmtojnë fijet e flokëve, ndërsa djersa dhe lagështia mund të bllokojnë folikulat, duke shkaktuar irritime të lëkurës së kokës. Nëse kësaj i shtoni edhe kripën e detit apo klorin e pishinave, përfitoni një kombinim që e bën flokun më të dobët, më të brishtë dhe më të prirë për të rënë.
Mundesh me e lexu edhe...
A është ky fenomen i lidhur me ndonjë proces natyror?
Shumë dermatologë dhe trichologë besojnë se ka edhe një arsye evolutive: gjatë verës, flokët bëhen më të dendur për të mbrojtur kokën nga dielli. Por, kur vera përfundon, kjo “mburojë e përkohshme” nuk është më e nevojshme – dhe bie. Kjo është arsyeja pse shumë njerëz vërejnë rënie të shtuar të flokëve gjatë gushtit dhe shtatorit.
Kjo rënie sezonale e flokëve nuk është e përhershme
Ky proces quhet efluvium telogjen, një gjendje ku një numër më i madh i qimeve kalon njëkohësisht në fazën e pushimit. Flokët bien përkohësisht, por më pas rifillojnë ciklin e rritjes. Edhe pse mund të duket shqetësuese, nuk bëhet fjalë për një humbje të përhershme në shumicën dërrmuese të rasteve, transmeton Telegrafi.
Si të kujdeseni për flokët gjatë verës?
1. Hidratimi është themeli:
Pini mjaftueshëm ujë dhe kujdesuni që dieta juaj të jetë e pasur me vitamina (si biotina dhe B12), minerale (si zinku dhe hekuri) dhe yndyrna të shëndetshme.
2. Përdorni produkte ushqyese:
Aplikoni vajra natyralë si vaji i kokosit apo i arganit, si dhe maska ushqyese me gjalpë shea, për të rikthyer lagështinë dhe elasticitetin e humbur.
3. Zgjidhni shampo pa sulfate dhe aromë:
Shampot e buta ndihmojnë në shmangien e irritimit të lëkurës së kokës dhe ruajnë baraspeshën natyrale të yndyrës.
4. Kufizoni mjetet termike (piastra, tharëse, figaro):
Nëse i përdorni, sigurohuni të aplikoni gjithmonë mbrojtje nga nxehtësia, pasi temperaturat e larta e dëmtojnë strukturën e fijeve.
5. Një truk i thjeshtë por efektiv:
Lani flokët me ujë të pastër para dhe pas notit – kjo ndihmon në reduktimin e absorbimit të kripës apo klorit.
6. Masazhoni skalpin:
Përdorimi i një masazheri për kokën mund të ndihmojë jo vetëm në relaksim, por edhe në përmirësimin e qarkullimit të gjakut, duke forcuar rrënjët e flokëve.
Kur duhet të kërkoni ndihmën e mjekut?
Nëse rënia e flokëve zgjat më shumë se 2–3 muaj, shfaqen zona pa flokë, kruarje apo ndjeshmëri në lëkurën e kokës, është e rëndësishme të konsultoheni me një dermatolog. Vetëm një profesionist mund të përcaktojë shkakun dhe të rekomandojë trajtimin e duhur. /Katror.info
Përgatiti:
