Struktura të ndërtuara me gurë dhe llaç gëlqeror, e fragmente të qeramikës janë zbuluar gjatë punimeve të kontraktuara nga Kompania për Distribuimin e Energjisë Elektrike – KEDS, në rrugën “Agim Ramadani”.
Gjetje arkeologjike janë zbuluar në anën veriore të Xhamisë së Çarshisë (përballë ndërtesës së Kuvendit të Kosovës) në zonën historike të Prishtinës, shkruan Kallxo.com.
Punime në atë zonë po bëheshin për shtrirjen rrjetin elektrik në të dy anët e rrugës “Agim Ramadani”, por pa leje të institucioneve të trashëgimisë kulturore.
Mundesh me e lexu edhe…
Ministria e Kulturës, Rinisë dhe Sportit ka thënë për KALLXO.com, se gjatë punimeve të bëra janë zbuluar struktura të ndërtuara me gurë dhe llaç gëlqeror, po ashtu është hasur edhe në fragmente të qeramikës, të cilat, siç thotë MKRS-ja sipas vlerësimeve preliminare të arkeologëve të Institutit Arkeologjik të Kosovës (IAK), i takojnë periudhës Osmane.
“Punimet janë ndaluar nga Inspektorati i Trashëgimisë Kulturore në momentin kur është vërtetuar se janë hasur mbetje arkeologjike. Punimet janë realizuar në zonën historike të Prishtinës, përkatësisht në anën veriore të Xhamisë se Çarshisë dhe janë të kontraktuar nga KEDS”- ka thënë MKRS-së, për KALLXO.com.
MKRS-së thotë se KEDS nuk ka pasur pëlqim nga institucionet e trashëgimisë për punime e bëra në rrugën “Agim Ramadani”, që ndodhet në zonën historike.
Ndërkaq, Lulzim Krasniqi, zëdhënës i KEDS-it, ka thënë për KALLXO.com se punimet po bëheshin për zbatimin e punimeve në rrjet (elektrik) në zonën në fjalë. Ai ka thënë se KEDS-i është pajisur paraprakisht me leje pune nga Komuna e Prishtinës.
Krasniqi ka thënë se KEDS-i nuk ka pasur njohuri nëse kjo është zonë historike dhe që duhet të aplikohet për leje në Qendrën Rajonale për Trashëgimi Kulturore në Prishtinë.
“Sidoqoftë, aktualisht KEDS-i po merret me parapërgatitjen e dokumentacionit të nevojshëm që po e kërkon kjo qendër, në mënyrë që të aplikohet pastaj për leje pune” – ka thënë ai, për KALLXO.com.
Sipas ligjit për Trashëgiminë Kulturore, çdo ndërhyrje që planifikohet të bëhet në zona historike apo në afërsi të aseteve të trashëgimisë kulture duhet të ketë paraprakisht pëlqim nga institucionet përgjegjëse të trashëgimisë kulturore./Katror.info.
