Gjuhësi, rock & metal e ekspozita – Rekomandimet e Suzanne Podcast për këtë javë!

Kjo javë ju fton me dëgju tinguj muzikor të krejt llojeve: më 20 gusht Servis Collective rikthehet me Re:Form në AMC Hall Garden, ku Spekki Webu sjell ritualin e tij sonik. Në të njëjtën mbrëmje, në majë të Goleshit, KISSMET x NXT LVL prezanton Viikatory për një udhëtim prej 12 orësh nga trance-i i viteve ’90 tek house-i i shpejtë. Po atë natë, Europe House Prishtinë hap ekspozitën Vështrime të reja me punët e Lum Hajrullahut dhe Festa Ramojës.

Rocku e metali marrin skenën në Divided Community nga Ali Hill Express me 24 bende, prej Hawolf e Zwada deri te Shashtrises nga Holanda. Për ata që kërkojnë presionin e natës pa dritë e pa skenë, eventi i fshehtë më 20 gusht mbledh Rorganic, Mindbend dhe Satyr në një lokacion të panjohur.

Ndërsa në Shipni, Himara International Music Festival IV sjell një kaleidoskop tingujsh: klasik, flamenco e jazz buzë detit. N’Shipni e keni edhe ekspozitën te galeria GOCAT me fotografi të Barry Lewis.

Monday Marks kryesisht muzikor, për me kcy deri n’sabah. Edhe pak javë vere na kanë mbetë, kështu që kënaquni sa mundeni.

Me kcy: “Re:form” me Spekki Webu / AMC Hall

Dostat tonë në Servis po vijnë me edicionin e ri të shumëpritun të RE:FORM. Më 22 gusht, në AMC Hall Garden, Prishtinë, kolektivi Servis po e shënon kapitullin e ri me një ngjarje që vjen “e formume nga ritmi, kohëzgjatja maratonike dhe detajet sonike”. Në qendër të programit osht Spekki Webu, themelues i labelit Mirror Zone, artist i njohun për setet e tij shtresume me trance, që hapin territore të reja perceptimi. Tingulli i tij shpërhapet në pulsim ngashnjues e kulme të gjana, një ritual i gjallë që rikalibron shqisat. Frontin e natës e zgjanojnë Ali Güney, Genc Elezaj dhe Ksenark, tu e mbajtë udhëtimin sonik të hapun e të gjallë deri në sabah t’dritës.

Me mësu e me diskutu: Seminari Ndërkombëtar për Gjuhën, Letërsinë dhe Kulturën Shqiptare / Prishtinë

Po fillon Seminari i 43 me rradhë dedikum gjuhës dhe kulturës shqiptare. Plot studiues me plot tema interesante prej gramatikës e deri te antropologjia sociale, e që prek aspekte të ndryshme të shqipes, marrin pjesë në ligjerata, kurse, punëtori nga 18-29 gusht. Seminari ka një karakter shumë – dimensional dhe multi-disiplinar dhe zakonisht vijnë ligjerues nga Japonia e Norvegjia deri tek Bullgaria e Turqia, si dhe plot mysafirë e shkrimtarë nga trojet ku flitet shqipja . Me kalimin e kohës, kjo ngjarje është shndërruar në një shkollë të llojit të vet nga fushat e gjuhës, letërsisë dhe kulturës shqiptare si dhe të albanologjisë në përgjithësi. Po e veçojmë eventin e 21 gushtit, kur “Alter Habitus” – Instituti Feminist për Studime në Shoqëri dhe Kulturë, në kuadër të Seminarit, organizon nji tryezë diskutimi me temën ‘Studimet Feministe Shqiptare: këndvështrime për teoritë dhe metodologjitë e munguara.’

Me kcy: Festivali rock & metal “Divided Community” / e.d.h.e., Prishtinë

Shkojmë me edicionin nr.3 i ‘Divided Community’ që ka mu mbajt në EDHE me daten 22 edhe 29 Gusht. ALI HILL EXPRESS sjell festivalin përgjatë dy netëve, që i kushtohet skenës së rockut, punkut dhe heavy metalit nga Kosova dhe ma gjanë. Këtë vit programi vjen me 24 bende, tu e kriju një panoramë të papërmbajtshme të zanit të randë dhe shpirtit të pavarur. Llajnapi përfshin emra të njohur të skenës vendore si Sand Castle, Hawolf, Sotap, Zhglë, Frenetik, Zwada, Telikput, Nuclear Doom, Calico, Solar Flare, Pathogen, Tr3diot, Shlem, PinkMetal, Star Fish, Rat The Toy, Inorga dhe Dibiduzz, por edhe prurje ndërkombëtare si Mallard (MKD) dhe Shashtrises (NL). Super event me i lshu flokt teposhtë e energjinë tenaltë edhe dihet.. shutke.

Me pa: Ekspozitë “Vështrime të reja – Një rrugëtim përmes syve të rinjve” / Europe House, Prishtinë

Qe edhe pak art vizuel në Monday Marks. Kjo ekspozitë sjell vizionet e freskëta të Lum Hajrullahu dhe Festa Ramoja në Europe House Prishtinë, kurume nga Laureta Hajrullahu dhe Shkamb Jaka “Vështrime të reja” sipas kuratorëve “prezanton dy perspektiva unike që kapin intensitetin e papërpunum të mënyrës se qysh te rinia e sheh botën. Nga momentet intime e njerëzore deri te horizontet e largëta e të gjana, këto punime na kujtojnë se vizioni rinor gjithmonë përjetohet me qartësi dhe emocion të thellë.” Ekspozita hapet me 20 gusht 2025 në ora 19:00.

Me kcy: Urban Sessions x EUPHORIA me Rorganic / Secret location.

Qe një ngjarje me një vend sekret. Kush e din, e din. Me 20 gusht, Ubran FM dhe Euphoria pe sjellin nga Franca, Rorganic, bashkëthemeluesin i Obsession, me setet e tij të pamëshirshme me BPM të nalt dhe tekstura industriale që nuk lanë fort hapsinë për frymëmarrje. Llajnapi vazhdon me Mindbend me shpirtin e viteve ’90: groove të shtrembnume, loops të ngjeshuna dhe një teh që shpon drejt e në zemër të natës, ndërsa Satyr sjell hipnozën: një emër në ngjitje që shtyn technon atmosferike drejt territoreve pak ma t’ashpra. Krejzi. Kjo natë po get nuk osht për gjithkond.

Me kcy: “N’Maje” me Viikatory / Maja e malit Golesh

A jeni gati me kcy n’mal? Më 22 gusht, në majën e majës së Goleshit, KISSMET dhe NXT LVL po e sjellin një udhëtim muzikor dymbëdhjetëorësh prej muzgut deri në agim, me një ambient ku Viikatory, producente dhe DJ nga Bjellorusia me bazë në Varshavë, merr drejtimin. Krijimtaria e saj osht një fuzion stilesh dhe epokash muzikore: miksime që e zhysin skejt publikun në vorbullën e tranceit të viteve ’90 dhe houseit të shpejtë, ndërthurun me linja vokale të gjata e të bukura, brenda historisë së techno dhe electro. Llajnapi përfshin edhe yjet vendore Leg-off, Toskë, M1M1 dhe Uran B. Biletat i gjeni në RAVE Travel e detajet i keni këtu.

Me dëgju: Himara International Music Festival / Himarë,

Ky edicion i Himara International Music Festival sjell taman një kaleidoskop tingujsh dhe llojesh të muzikës. Nga eleganca e muzikës klasike e deri te pasioni i flamenkos spanjolle dhe gjallnia e jazzit eklektik, publiku në jug të Shqipnisë ka me gjetë një program të larmishëm që shtrihet dikund mes traditës dhe inovacionit. Festivali i katërt në Himarë ka m’i mbledhë artistë vendas dhe ndërkombëtarë për një verë që e shndërron këtë pjesë të rivierës shqiptare në skenë të hapun të muzikës. Ja nisë me 21 gusht e përfundon me 28 gusht.

Me pa: Ekspozita “Shot / Reverse Shot” e Barry Lewis / Galeria GOCAT, Tiranë

Kjo ekspozitë osht hapë tash e disa javë, por ka me ndejt e kapun deri në fillim shtatori, kështu që nëse jeni n’Tironë, ja vlenë me shku te Galeria GOCAT me pa. Ekspozita sjell për herë të parë në Shqipëri arkivën e rrallë të fotografit britanik Barry Lewis, të realizume mfsheftaz në vitet 1990–1991, në një Shqipni të izolume, të mbyllun ndaj syrit të jashtëm dhe alergjike ndaj fotografisë përtej propagandës. Përballë ktyne imazheve që kapin dramën e një vendi në tranzicion, qëndrojnë veprat e artistëve të Pressura – Nomadic Art Colony: një gjeneratë që nuk e përjetoi diktaturën, por e trashëgoi kujtimin dhe pasojat e saj. Sipas organizatorëve, “kjo nuk osht një ekspozitë për historinë e ngjarjeve të kalume, por për ato që hala s’kanë perfundu”.

M’u zbukuru: Aksesorë nga studio Vaya / Prishtinë

Qe një brend kosovar që i plotëson krejt kërkesat: edhe janë sende t’bukura, edhe t’reciklume, edhe të përdorshme në raste të ndryshme. Aksesorët (kryesisht çanta të madhësive të ndryshme) e Vaya Wave, të dizajnume nga Rita Abdullahu, janë thurruna me fije të trasha, nga materiale të reciklume, ama me dizajne dhe ngjyra shumë të freskëta dhe kontemporane, si për ecje nëpër xhungllën urbane të qyteteve tona ngjyrë hini, ashtu edhe sfilata spontane nëpër pllazhat dhe pishinat verore. Produktet janë unike, tekstura e trashë, ngjyrat e dhezta. Vaya ka edhe qafore e hallhalle t’lezetshme. Menxi s’po presim me ble nëjnjo, por qe ku i keni edhe ju.

/Katror.info.

Marrë nga Suzanne Podcast.